विराटनगर महानगरको आम्दानीभन्दा खर्च धेरै

१७ माघ, वराटनगर । विराटनगर महानरपालिकाले ६ महिनाको अवधिमा १३ करोड ४२ लाख २२ हजार राजश्व उठाएको छ । महानगरको पुँजीगतभन्दा चालु खर्च बढी देखिएको छ । महानगरसभाको १३ औँ अधिवेशनमा प्रस्तुत आर्थिक वर्षको अर्धवार्षिक समीक्षामा खर्चमध्ये पुँजीगततर्फ ३८ करोड ६७ लाख १६ हजार र चालुतर्फ ६२ करोड १५ लाख १९ हजार भएको विवरण प्रस्तुत गरिएको छ । 

उपमेयर शिल्पा निराला कार्कीले चालु आर्थिक वर्ष २०८०÷८१ को अर्धवार्षिक समीक्षा प्रस्तुत गर्दै तीन अर्ब २८ करोड ५० लाख आय अनुमान गरिएकोमा पुस मसान्तसम्म एक अर्ब आठ करोड ६८ लाख ५१ हजार ७०० रुपैयाँ (३३ प्रतिशत) मात्रै भएको जानकारी दिइन् । 

कुल अनुमानित व्यय तीन अर्ब २८ करोड ५० लाख अनुमान गरिएकोमा पुस मसान्तसम्म यथार्थ व्यय एक अर्ब तीन करोड १६ लाख ९३ हजार मात्रै भएको छ । महानगरले चालु आर्थिक वर्षको ६ महिनामा २१ करोड ७ लाख ९६ हजार ९ सय रुपैयाँ आन्तरिक राजस्व संकलन गरेको छ । चालु आर्थिक वर्ष ८९ करोड ५० लाख रुपैयाँ राजस्व संकलन गर्ने लक्ष्य राखेको छ । 

राजस्व बाँडफाँटबाट प्राप्त राजस्वतर्फ ७० करोड २५ लाख ३ हजार अनुमान गरिएकोमा १३ करोड ४२ लाख २२ हजार ९ सय मात्रै प्राप्त भएको छ । अन्तरसरकारी वित्तीय हस्तान्तरण संघीय सरकारतर्फ १ अर्ब १९ करोड २४ लाख रुपैयाँ अनुमान गरिएकोमा ६७ करोड ८८ लाख ६४ हजार ५ सय रुपैयाँ अनुदान प्राप्त भएको छ ।  

प्रदेश सरकार अन्तरसरकारी वित्तीय हस्तान्तरणतर्फ चार करोड ६६ लाख ६३ हजार रुपैयाँ अनुमान गरिएकोमा पुस मसान्तसम्म १ करोड २९ लाख ७६ हजार ७ सय रुपैयाँ प्राप्त भएको छ । जनसहभागितातर्फ आठ करोड ७९ लाख ३४ हजार रुपैयाँ अनुमान गरिएकोमा पुस मसान्तसम्म ९४ लाख ४७ हजार रुपैयाँ मात्रै उठेको छ ।