लेकसाईडमा पर्यटकलाई हैरानी दिने ६ जना पक्राउ

१८ माघ, पोखरा । जिल्ला प्रहरी कार्यालयले पोखराको लेकसाईडबाट छ जनालाई पक्राउ गरेको छ । लेकसाईडको हल्लनचोक क्षेत्रमा पर्यटकलाई अनावश्यक कुरामा दुःख र हैरानी गर्ने छ जनालाई पक्राउ गरिएको जिल्ला प्रहरी कार्यालय कास्कीले जनाएको छ । 

पर्यटकहरुलाई बिच सडकमा बाटो छेक्ने, होटल मिलाई दिन्छौ भनी पैसाको ‘बार्गेनिङ’  गर्ने, भ्रमणका विभिन्न प्याकेजहरु मिलाइदिन्छौं भन्दै पर्यटकलाई दुःख दिनेहरू प्रहरीको पक्राउ परेका हुन् । पक्राउ पर्नेहरूमा कास्की पोखरा महानगरपालिका ६ का २२ वर्षीय सुदीप अर्याल, २६ वर्षीय सन्दीप गिरी, १९ वर्षीय सुमन शर्मा, २० वर्षीय नेत्र बहादुर प्रधान, २३ वर्षीय सुशील महतो र २६ वर्षीय राजन पौडेल रहेका छन् । उनीहरु सबै पोखरा ६ लेकसाईडका हुन् । 

पक्राउ परेका छ जनालाई सार्वजनिक स्थानमा होहल्ला मच्चाउने जस्ता अपराध कार्य गरेका भन्दै सार्वजनिक हित, स्वास्थ्य, सुरक्षा, सुविधा र नैतिकता विरुद्धको कसुर अन्तर्गत अभद्र व्यवहारमा जिल्ला अदालत कास्कीबाट म्याद गरी अनुसन्धान प्रक्रिया अगाडि बढाइएको जिल्ला प्रहरी कार्यालयले जनाएको छ ।