विदेश पठाइदिने भन्दै ६ सय जनासँग पैसा उठाएर चार करोड ऋण तिरेर ५० लाखको गाडी किनेका मेनपावर व्यवसायी पक्राउ

१८ माघ, काठमाडौं । विदेश पठाइदिने भन्दै कडोरौं ठगेको आरोपमा काठमाडौं उपत्यका अपराध अनुसन्धान प्रहरीले एक जनालाई पक्राउ गरेको छ । माल्टा, पोल्याण्ड, क्रोएसिया, क्यानडालगायत युरोपका विभिन्न देशमा पठाइदिने भन्दै करोडौं ठगेको आरोपमा विकास वाइवा भनिने सुजन तामाङ पक्राउ परेको उपत्यका अपराध अनुसन्धान कार्यालयका प्रमुख तथा प्रहरी वरिष्ठ उपरीक्षक सोमेन्द्रसिंह राठौरले जानकारी दिए । उनलाई ललिपुरकाे लेलेबाट पक्राउ गरिएकाे उनले बताए ।

बालाजुमा युरो वीङ्स एजुकेशन कन्सल्टेन्सी सञ्चालन गरेर ६ सय भन्दा बढी व्यक्तिबाट करोडौं रूपैयाँ लिएर ठगी गरेको आरोपमा तामाङ पक्राउ परेका हुन् । विकास वाइवाको नक्कली परिचय पत्र बनाएर उनी ठगीमा संलग्न भएको प्रहरीको प्रारम्भिक अनुसन्धानबाट खुलेको जनाएको छ । एक जनाबाट ५० हजारदेखि ५ लाख रूपैयाँसम्म ठगी गरेको देखिएको प्रहरीले जनाएको छ ।

पक्राउ परेका तामाङले विसं २०७३ सालबाट अयुस म्यानपावरलगायत विभिन्न मेनपावरमा एजेन्टका रुपमा करिब पाँच वर्ष काम गरी विभिन्न व्यक्तिहरुलाई दुबई, कतार मलेसियामा पठाएको प्रहरीको भनाइ छ । साथै २०७७ सालमा ठगी तथा अपराधिक लाभसम्बन्धी कसुर मुद्दामा फरार रही नेपाल तथा भारतको विभिन्न स्थानमा लुकीछिपी बसेको, २०८० वैशाखमा आफूलाई विकाश वाइवा भनी नक्कली परिचय दिई बालाजुमा युरो विग्ङ्स एजुकेसन कन्सलटेन्सी सञ्चालन गरेको पनि प्रहरीले जानकारी दिएको छ ।

पक्राउ परेका तामाङले युरोपियन मुलुकमा कामदार पठाउँछु भनेर क्यानडाका लागि १८ लाख, माल्टाका लागि आठ लाख, पोल्याण्डका लागि सात लाख र क्रोशियाका लागि छ लाख ५० हजार रूपैयाँका दरले ठगी गरेको प्रहरी नायव उपरीक्षक अनिल घिमिरेले जानकारी दिए। 

उनले सरकारी निकायका कर्मचारीलाई समेत युरोप पठाउने भनी रकम लिई नक्कली भिसा देखाई जागिर छाड्न लगाएको तथा विकास वाईवाको नामबाट बैंक खाता खोली आफैले हस्ताक्षर गरी वैंक तथा वित्तीय संस्थामार्फत आर्थिक कारोबार गरेको अनुसन्धानबाट खुलेको प्रहरीको भनाइ छ ।

बुधबार पक्राउ परेका उनलाई बिहीबार सार्वजनिक गर्दै प्रहरीले आरोपित तामाङले ठगीको रकमबाट ४ करोड व्यक्तिगत ऋण तिरेको, राप्ति मेनपावर वसुन्धरामा ५० लाख बराबरको सेयर किनेको र ३५ लाखमा हुण्डाईको क्रेटा गाडी खरिद गरेको पाइएको प्रहरीले जनाएको छ ।  साथै भाईको खातामा १५ लाख ५० हजार  रूपैयाँ जम्मा गरेको, जलविद्युत सहकारी संस्थाबाट लिएको १५ लाख ऋण तिरेको तथा ५ लाखको सुनको ब्रास्लेट खरिद गरेको पत्ता लागेको काठमाडौँ उपत्यका अपराध अनुसन्धान कार्यालयले जनाएको छ ।