आठौं वालिङ महोत्सवः औपचारिकताका लागि मात्रै आए मुख्यमन्त्री, १५ मिनेट भाषण गरे हिँडे

१८ माघ, स्याङ्जा । बिहिबारदेखि सुरु भएको आठौं वालिङ महोत्सव उद्‍घाटन गर्न आएका गण्डकी प्रदेशका मुख्यमन्त्री सुरेन्द्रराज पाण्डे उद्‍घाटन सत्र नसकिँदै हिँडे । कार्यक्रममा उपस्थित विशिष्ट अतिथि र अतिथिहरूको बोल्ने क्रम जारी रहँदा बिचमै समय मागेर बोलेका मुख्यमन्त्री पाण्डे करिब १५ मिनेटको छोटो भाषणा गरेर हिँडे ।

स्थानीय कृषि, पर्यटन र संस्कार–संस्कृतिको संरक्षणमा गण्डकी प्रदेश सरकार लागेको छोटो नीति तथा कार्यक्रम सुनाउन भ्याएका उनको भाषण गराइहेर्दा हतास मानसिकताको देखिन्थ्यो ।

उद्‍घाटन सत्रका पूर्ववक्ता कालीगण्डकी गाउँपालिकाका अध्यक्ष खिम बहादुर थापाले अघिल्लो सरकारको नीति तथा कार्यक्रम काटेको भन्दै मुख्यमन्त्री पाण्डे र गण्डकी प्रदेश वर्तमान सरकारको खरो अलोचना गरेका थिए । मुख्यमन्त्री पाण्डेले थापासँग सवालजवाफ गर्न खोजेपनि त्यति मेसो भने पाएनन् । भाषणको लय जुन सिलसिलामा हुनुपर्थ्यो, भएन । 

बुधबार रातिसम्म महोत्सवमा आउने नआउने भन्ने विषयमा अन्योल रहेका मुख्यमन्त्री पाण्डे अन्ततः पार्टीको ठूलो दबावले आएको गोप्य स्रोतले नेपाल बहसलाई जानकारी दिए । शेरबहादुर देउवाको आर्शिवादले मुख्यमन्त्री बनेका उनी प्रदेशकै बहालवाला मन्त्रीको दबावमा वालिङ आएको बताइन्छ ।

महोत्सव उद्घाटनलाई भन्दा पनि उनी वालिङमा नेपाली कांग्रेस भित्रको एउटा गुटको इज्जत राख्नका लागि आएको जनाएको छ । वालिङ कांग्रेस भित्रको संस्थापन र इतर पक्षका द्वन्द्वका कारण महोत्सवमा प्रमुख अतिथि कसलाई ल्याउने भन्ने विषयमा चर्को विवाद भएको थियो । कार्यसमितिको बैठकमा प्रमुख अतिथिकै विषयलाई लिएर म्याइन्यूट खोसाखोस र हातहालाहालको स्थित समेत सिर्जना भएको थियो ।