वालिङ महोत्सव: आयोजकले मनपरी पास बाँडेको भन्दै सचिवालय तोडफोड

१८ माघ, वालिङ । आजदेखि सुरु भएको आठौं संस्करणकाे वालिङ महोत्सवको सचिवालय तोडफोड भएको छ । नेपाली कांग्रेस निकट भ्रातृसंगठन तरुण दलका युवाहरूले सचिवालयमा रहेका टेबल, कुर्सी लगायतका सामानहरू तोडफोड गरेको जनाएको छ । 

आठाै‌ं वालिङ महोत्सव २०८० मुल समितिका निर्देशक शोभाकान्त पौडेल, संयोजक चेतनारायण श्रेष्ठ, महासचिव रमेश अर्याल र सचिव पिताम्बर खनाल (सुशील) लगायतका पदाधिकारीले महोत्सवको स्थायी र पटके प्रवेश पास मनपरी बाँडेको भन्दै तरुण दलका अहमद अलि, बीरबहादुर गुरुङ लगायतले सचिवालयकाे कुर्सी फोडेको वालिङ उद्योग वाणिज्य संघका एक पदाधिकारीले जानकारी दिए ।

बीरु गुरुङले आफ्नै सामाजिक सञ्जाल फेसबुकमा पोष्ट गरि सार्वजनिक गरेका छन् । हेर्नुस उनको फेसबुक स्टाटस...

निर्देशक पौडेल, संयोजक श्रेष्ठ, महासचिव अर्याल र सचिव खनालले आफू र आफ्ना पार्टी निकटका युवा, विद्यार्थी, महिला स‌ंगठन र परिवार भित्रका सबै सदस्यहरूलाई पास वितरण गरेकाे पाइएको छ । महोत्सव मुल आयोजक समिति भित्र आफ्नो हैसियत र जिम्मेवार अनुसार पास बाँडफाँड गरिएको छ । वालिङ उद्योग वाणिज्य संघ र आठौं वालिङ महोत्सवको छाप (स्ट्याम्प)समेत प्रत्येकले झोलामा लिएर हिँडेको पाइएको छ ।बुधबार साँझ बसेकाे महाेत्सव आयाेजक समितिकाे बैठकमा एक पदाधिकारीले आफ्नाे हैसियत अनुसार पासमा हस्ताक्षर गर्न पाउनुपर्छ भन्दै विवाद सिर्जना गरेका थिए ।

उता महोत्सवका ठेक्का पाएका बंगलामुखी नेपाल एम्युजमेण्ट प्रा.लिका सञ्चालक टेक बहादुर कार्की (शंकर) आयोजकसँग भएको सम्झौता बमोजिमको मात्रै पास दिने अडान राख्दै आएका छन् । गत मङसिर १० गते बंगलामुखी र वालिङ वाणिज्य संघबीच भएको सम्झौतामा दोस्रो पक्ष (बंगलामुखी)ले १७ सय स्थायी पास र ६ हजार पटके पास दिने सहमति भएको भन्दै आफ्नो अडान राख्दै आएको जनाएको छ । 

भोलि आफूलाई राजनीतिक, सामाजिक र व्यक्तिगत जीवनमा सहयोग पाउने आशामा पास वितरण गर्ने पाइएको छ । विशेष गरी राजनीतिक क्षेत्रमा लागेका पदाधिकारीहरू मात्रै नभइ सामान्य उपसमितिमा बसेका सदस्यले पनि एक पास बराबर एक भोटको आशा राख्दै पास वितरण गरेको पाइएको छ ।