राजस्व नउठाएको आरोपमा करका हाकिम मैनाली पुगे सार्वजनिक ऋण व्यवस्थापन कार्यालय

२० माघ, काठमाडौं । सार्वजनिक खर्चको चापमा रहेका अर्थमन्त्री प्रकाशशरण महतले राजश्वको मुख्य स्रोत आन्तरिक राजस्व विभागले बजेटको लक्ष्य अनुसार राजश्व उठाउन नसकेको भन्दै करका हाकिम परिवर्तन गरेका छन् । शुक्रबार उनले आन्तरिक राजस्व विभागका महानिर्देशक परिवर्तन गरेका छन् । 

पूर्व अर्थमन्त्री जनार्दन शर्मामा विभागको महानिर्देशक बनाएका दीर्घ मैनालीलाई मन्त्री महतले हटाएका छन् । विभागको जिम्मेवारी अर्थ मन्त्रालयको संस्थान समन्वय तथा वित्तीय क्षेत्र व्यवस्थापन महाशाखा प्रमुख रहेका भुपाल बराललाई दिइएको छ । मैनालीलाई सार्वजनिक ऋृण व्यवस्थापन कार्यालय पुगेका छन् । 

आन्तरिक राजस्व विभागको महानिर्देशक हुनु अघि मैनाली सार्वजनिक ऋण व्यवस्थापन कार्यालयमा नै थिए । मैनालीलाई अर्थ मन्त्रालय अन्तर्गत शक्तिशाली मानिने आन्तरिक राजस्व विभागको जिम्मेवारी तत्कालीन अर्थमन्त्री जनार्दन शर्माले २०७९ मंसिरमा दिएका थिए । लक्ष्यअनुसार राजस्व संकलन गर्न नसकको भन्दै मन्त्री महत मैनालीसँग असन्तुष्ट रहेका थिए । 

मन्त्री महतले बराल प्रमुख रहेको संस्थान समन्वय महाशाखाको जिम्मेवारी नारायण रिजाललाई दिइका छन् । यस्तै, त्रिभुवन अन्तर्राष्ट्रिय विमानस्थल भन्सार कार्यालय प्रमुख रहेका टोक राज पाण्डेलाई अर्थ मन्त्रालयको प्रशासन महाशाखामा लगिएको छ ।

प्रशासन महाशाखा प्रमुख रहेका महेश आचार्यलाई आर्थिक नीति विश्लेषण महाशाखा प्रमुखको जिम्मेवारी दिईएको छ । पाण्डेको ठाउँमा भन्सार विभागका उपमहानिर्देशक सेवन्तक पोखरेललाई लगिएको छ । आन्तरिक राजस्व विभागका उपमहानिर्देशक टंक पाण्डेलाई भन्सार विभागको उपमहानिर्देशक बनाइएको छ ।