अरुण चौधरी सीआईबीसमक्ष जग्गा फिर्ता गर्न तयार

२० माघ, काठमाडौं । बाँसबारी छाला जुत्ता कारखानाको जग्गा हिनामिना गरेको आरोपमा पक्राउ परेका चौधरी समूहका अरुणकुमार चौधरीले प्रहरीसमक्षको बयानमा कानुन विपरीत भए उत्ता जग्गा फिर्ता गर्ने बताएका छन् ।

सरकारी वकिलको रोहबरमा केन्द्रीय अनुसन्धान ब्यूरो (सीआईबी) का अनुसन्धान अधिकृतहरुले १० घण्टा बयान लिएका थिए । बयानमा उनले कानुन अनुसार नभएको भए जग्गा फिर्ता गर्न आफू तयार रहेको बताएका हुन् । सीआईबी टोलीले शुक्रबार दिनभर बयान लिइएको थियो । त्यसक्रममा चौधरीले आफूले सबै काम कानुन अनुसार नै गरेको बताएका हुन् । 

यदि कानुन विपरीत हो भने आफू जग्गा फिर्ता गर्न तयार रहेको बताएका अनुसन्धानमा संलग्न एक अधिकृतले बताए । केन्द्रीय अनुसन्धान ब्यूरो (सीआईबी) ले शुक्रबार पत्रकार सम्मेलन गरेर तीन महिना लामो अनुसन्धानपछि चौधरीले १० रोपनी जग्गा हिनामिना गरेको देखिएको दाबी गरेको थियो । ब्यूरोले संकलन गरेको कागजात र प्रमाणका आधारमा उनलाई थप अनुसन्धानका लागि पक्राउ गरिएको थियो । 

प्रहरीले बाँसबारी छाला तथा जुत्ता कारखानाका तत्कालीन कार्यकारी निर्देशक अजितनारायण थापासँग पनि बयान लिइसकेको छ । उनले आफूले गरेको निर्णय गलत हो भन्ने थाहा नभएको बयान दिएका छन् ।  प्रहरीले बिहीबार अपराह्न सीजी चाँदबाग रेसिडेन्सीका अध्यक्ष सञ्जय ठाकुरलाई पनि पक्राउ गरेको थियो । बिहीबार चौधरी र थापालाई अदालतले ४ दिन हिरासतमा राखेर अनुसन्धान गर्न अनुमति दिएको थियो ।