जग्गा हिनामिनाको अनुसन्धानका लागि पक्राउ गरिएका चौधरीसहित ३ जनाको आज म्याद थप गरिँदै

२२ माघ, काठमाडौं । सीआईबीको नियन्त्रणमा रहेको व्यवसायी अरुण चौधरी, तत्कालीन अध्यक्षद्वय अजित नारायणसिंह थापा र सञ्जय ठाकुरलाई आज म्याद थपका लागि अदालत लगिँदैछ ।  बाँसबारीको १० रोपनी जग्गा निजीकरण गरेको आरोपमा उनीहरुलाई पक्राउ गरिएको थियो । 

जग्गा हिनामिना गरेको आरोपमा तत्कालीन च्याम्पियन फुटवेयर प्रालिका सञ्चालक अरुण कुमार चौधरी, बाँसबारी छाला जुत्ता कारखानाका लिमिटेडका तत्कालीन अध्यक्ष अजित नारायण सिंह थापा र सिजी चाँदाबाग रेसिडेन्सी प्रालिका अध्यक्ष सञ्जय ठाकुर थुनामा छन् ।
 
केन्द्रीय अनुसन्धान ब्युरोले उनीहरूलाई माघ १८ मा पक्राउ गरेको हो । जिल्ला अदालत काठमाडौँले दिएको ४ दिनको म्याद सकिएपछि सोमबार उनलाई पुनः म्याद थप गर्न अदालतमा उपस्थित गराउन लागिएको सीआईबीले जनाएको छ ।