सभामुख र उपसभामुख नभएको बेला बैठक चलाउन ७ जना चयन, माघ २४ गतेसम्म संसद बैठक स्थगित

२२ माघ, काठमाडौं । संघीय संसदको तेस्रो अधिवेशन सोमबारदेखि सुरु भएको छ । अपरान्ह ४ बजे संसदको हिउँदे अधिवेशन सुरु भएको हो । बैठकमा सभामुख देवराज घिमिरेले प्रतिनिधिसभाको बैठकमा आफू र उपसभामुखको अनुपस्थितिको अवस्थामा बैठकको अध्यक्षता गर्न ७ जना सदस्यहरूको मनोनयन गरेका छन् । 

सोमबार बसेको प्रतिनिधिसभाको तेस्रो अधिवेशनको पहिलो बैठकमा सभामुख घिमिरेले सांसदहरू ईश्वरीदेवी न्यौपाने, कृष्णगोपाल श्रेष्ठ, चन्दा कार्की भण्डारी, प्रतीक्षा तिवारी, विमला सुवेदी, बुद्धिमान तामाङ र रामकृष्ण यादवलाई मनोनयन गरेका हुन । 

उनीहरूलाई प्रतिनिधिसभा नियमावली, २०७९ को नियम १० बमोजिम बैठकको अध्यक्षता गर्न सदस्य मनोनयन गरिएको सभामुख घिमिरेले जानकारी गराएका छन् ।  प्रतिनिधि सभाको अर्को बैठक माघ २४ गते बिहान ११ बजे बस्ने गरी स्थगित गरेका छन् । 

यसअघि नै बैठक सञ्चालनका लागि गर्नुपर्ने प्राविधिक तथा भौतिक पूर्वाधार व्यवस्थापनको तयारी पूरा भएको थियो । नेपालको संविधानले स्थायी, प्रबुद्ध समूहको प्रतिनिधित्व रहने माथिल्लो सदन राष्ट्रिय सभा र तल्लो सदन प्रतिनिधिसभाको व्यवस्था गरेको छ ।

यस पटकदेखि अधिवेशनलाई कानुन निर्माणका हिसाबले प्रभावकारी र चुस्त तुल्याउन पाक्षिक रुपमा क्यालेण्डर बनाएर जाने तयारी भएको छ । तयारीका सन्दर्भमा हरेक १५–१५ दिनमा कार्यतालिका बनाउने र त्यसका आधारमा बैठक सञ्चालन हुँदैछ ।

विधेयक अधिवेशनका रुपमा रहने हिउँदे अधिवेशनका लागि हाल संघीय संसदमा २४ विधेयक छन् । त्यसमध्ये १६ विषयगत समिति छन् । एउटा विधेयक लामो समयदेखि राष्ट्रिय सभामा थाँती छ । आजको बैठकमा राष्ट्रपतिको कार्यालयबाट आएका सन्देशसहित पढेर सभामुख देवराज घिमिरेले सुनाए । त्यस्तै अन्य केही प्रस्ताव पनि पेश भएका छन् । अब अर्को बैठक माघ २४ गते बस्ने छ ।