देउवाले बोलाए कांग्रेसको आकस्मिक बैठक

२३ माघ, काठमाडौं । समुदायमा कांग्रेस अभियानका लागि धेरै जसो केन्द्रीय सदस्यहरु जिल्लामा रहेका बेला नेपाली कांग्रेसका सभापति शेरबहादुर देउवाले केन्द्रीय कार्यसमितिको बैठक बोलाएका छन । सांसद रहेका केन्द्रीय सदस्य मात्र उपत्यकामा छन् । 

नेताहरू जिल्ला जिल्ला पुगेपनि उपलब्ध केन्द्रीय सदस्यहरुलाई बैठकमा बोलाइएको छ । केन्द्रीय कार्यसमितिका सदस्य एवम् पूर्वमन्त्री केशवकुमार बुढाथोकीको सोमबार राति निधन भएको छ । उनको शोक प्रस्ताव पारित गर्न आकस्मिक बैठक बोलाइएको केन्द्रीय कार्यालयका मुख्यसचिव कृष्णप्रसाद पौडेलले जानकारी दिए । 

उनका अनुसार बैठक अहिले बिहान १० बजे सानेपास्थित पार्टी केन्द्रीय कार्यालयमा बोलाइएको छ । बैठका लागि नेताहरु पार्टी कार्यालय जान लागेका छन् । बैठकले अन्य निर्णय भने नगर्ने बताइएको छ ।