महानगरीय प्रहरीले हटायो रत्नपार्क शान्तिवाटिकाको धर्ना

२३ माघ, काठमाडौं । महानगरीय प्रहरीले रत्नपार्कको शान्ति वाटिकामा धर्नामा बसेकाहरूलाई हटाएको छ । मंगलबार बिहान नगर प्रहरीको टोलीले धर्नामा बसेकाहरूलाई हटाएको हो । शान्तिवाटिकामा मिटरब्याज पीडित, आरती साहको परिवार लगायत धर्नामा बस्दै आएका थिए । 

मिटर ब्याज तथा ठगीविरुद्ध किसान मजदुर संघर्ष समितिले करिब २५ जना बसिरहेकोमा आज महानगरीय प्रहरी प्रमुख राजुनाथ पाण्डेसहित नगर प्रहरीहरू आएर फालिदिएका थिए । उनीहरूलाई हटाउने क्रममा ठूलो संख्यामा प्रहरीहरू पनि परिचालन गरिएको थियो ।

यसअघि माइतीघरमा धर्नामा बसेकाहरूलाई प्रहरी प्रशासनले हटाएको थियो । माइतीघरमा निषेधित क्षेत्र घोषणा गरेर धर्ना र प्रदर्शन गर्नेहरूका लागि भृकुटीमण्डपमा स्थान तोकिएको थियो । तर मिटरब्याज पीडित लगायतका समूह शान्तिवाटिकामा धर्नामा बस्दै आएका थिए ।