कमजोर बन्दै एनएमबि बैंक: शेयरधनीको हात खाली,  वितरण योग्य मुनाफा ऋणात्मक

२३ माघ, काठमाडौं । कुनै समय एनएमबि बैंक भन्ने बित्तिकै माथिल्लो लेभलको वाणिज्य बैंकको रुपमा स्थापित भए पनि अहिले भने बैंकको अवस्था दिन प्रतिदिन बिग्रँदो छ । निरन्तर लाभांश दिँदै आएको कम्पनीले आर्थिक वर्ष २०७९-८० को मुनाफाबाट कुनै पनि लाभांश वितरण गरेन । वर्षौंदेखि लाभांश प्राप्त गरेका लगानीकर्ताको हात यसपटक खाली भएको छ ।

चालू आर्थिक वर्षको दोश्रो त्रैमासको वित्तीय विवरण पनि त्यति आकर्षक निकाल्न बैंकले सकेन । कम्पनीको मुनाफा २७.६२ प्रतिशतले घटेको छ भने प्रमुख आम्दानीको स्रोतमा रहेको खुद ब्याज आम्दानी पनि घटेको छ कम्पनीको वितरण योग्य मुनाफा ९९ करोड ४८ लाख ऋणात्मक रहेको छ ।

बैंकमा संचालक समितिको अध्यक्षमा मनोज कुमार गोयल रहेका छन् । बैंकको संचालक समितिका अन्य सदस्यमा शर्मिला हार्दि प्रकाश, जीवन कुमार कटवाल, उत्तम भ्लोन, हरिश्चन्द्र सुवेदी र शिरीष कुमार मुरारका र स्वतन्त्र सञ्चालकमा बन्दना पाठक तथा कम्पनी सचिवमा प्रमोद कुमार दाहाल रहेका छन् । 

त्यस्तै बैंकको उच्च व्यवस्थापनमा सीईओ सुनिल के.सी.देखि डेपुटी सीईओमा सुदेश उपाध्याय र गोविन्द घिमिरे तथा विभागीय प्रमुखहरुमा प्रमोद कुमार दाहाल, नवीन मानन्धर, श्रीजेष घिमिरे, डा.बुद्धि मल्ल, रोशन रेग्मी र पुष्पा अर्याल रहेका छन् ।

कस्तो आयो आर्थिक वर्ष २०८०-८१ के दोस्रो त्रैमासको वित्तीय प्रतिवेदनः

खुद मुनाफाः
चालू आर्थिक वर्षको दोस्रो त्रैमास अर्थात् ६ महिनाको अवधिमा बैंकले १ अर्ब ३७ करोड बराबर खुद मुनाफा गरेकोमा गत आर्थिक वर्षको दोस्रो त्रैमाससम्ममा बैंकले १ अर्ब ९० करोड बराबर खुद मुनाफा गरेको थियो । यसरी खुद मुनाफामा २७ दशमलव  ६२ प्रतिशतको गिरावट भएको छ ।

खुद व्याज आम्दानी र संचालन मुनाफाः
गत आर्थिक वर्षको दोस्रो त्रैमासमा कम्पनीले ४ अर्ब २६ करोड बराबर खुद ब्याज आम्दानी गरेकोमा चालू आर्थिक वर्षको दोस्रो त्रैमाससम्म कम्पनीले ३ अर्ब ७४ करोड खुद व्याज आम्दानी गरेको छ । यसरी खुद ब्याज आम्दानीमा १२ दशमलव ३९ प्रतिशतको गिरावट भएको छ । त्यस्तै, संचालन मुनाफा २८ दशमलव शून्य ३ प्रतिशतले गिरावट हुँदै १ अर्ब ९५ करोड पुगेको छ । गत वर्षको दोस्रो त्रैमासमा कम्पनीले २ अर्ब ७१ करोड संचालन मुनाफा गरेको थियो ।

प्रतिशेयर आम्दानीः
कम्पनीको वार्षिक प्रतिशेयर आम्दानी १४ रूपैयाँ ९८ पैसा हुन आउँछ । एक वर्ष अघि प्रतिशेयर आम्दानी २० रूपैयाँ ७० पैसा थियो । समीक्षा अवधिमा प्रतिशेयर आम्दानी २७ दशमलव  ६३ प्रतिशतले घटेको छ ।
वितरणयोग्य मुनाफा ः
कम्पनीको वितरण योग्य मुनाफा ९९ करोड ४८ लाख ऋणात्मक रहेको छ । गत आर्थिक वर्ष वितरण योग्य मुनाफा ६३ करोड ९७ लाख थियो । समीक्षा अवधिमा वितरणयोग्य मुनाफा २५५ दशमलव  ४९ प्रतिशतले घटेको छ । कम्पनीको प्रतिशेयर वितरण योग्य मुनाफा ७ रूपैयाँ शून्य १ पैसा ऋणात्मक रहेको छ । गत आर्थिक वर्ष प्रतिशेयर वितरण योग्य मुनाफा ६ रूपैयाँ ७७ पैसा थियो ।

निक्षेप, कर्जाः
कम्पनीले चालू आर्थिक वर्षको दोस्रो त्रैमाससम्म २ खर्ब ३१ अर्ब निक्षेप संकलन गरी १ खर्ब ९४ अर्ब कर्जा प्रवाह गरेको छ । आर्थिक वर्ष २०७९/८० को असार मसान्त र अहिलेको तथ्याङ्कलाई दाँजेर हेर्दा कम्पनीको निक्षेप संकलन ९ दशमलव ९९ प्रतिशतले वृद्धि भएको छ भने कर्जा प्रवाह पनि २ दशमलव ७३ प्रतिशतले वृद्धि भएको छ ।

जगेडा कोष, संचित मुनाफाः
जगेडा कोष १८ दशमलव  २७ प्रतिशतले बढेर १० अर्ब ५५ करोड पुगेको छ भने संचित मुनाफा १८७ दशमलव २० प्रतिशतले घटेर ९९ करोड ४८ लाख रूपैयाँ ऋणात्मक पुगेको छ ।
किताबी मूल्यः
कम्पनीको किताबी मूल्य (प्रतिशेयर नेट्वर्थ) १५२ रूपैयाँ शून्य ६ पैसा आउँछ ।
निष्क्रिय कर्जाः
कम्पनीको खराब कर्जा २ दशमलव ८६ प्रतिशत रहेको छ । गत आर्थिक वर्षको दोस्रो त्रैमासमा खराब कर्जा २ दशमलव २४ प्रतिशत थियो ।

आधार व्याजदर, स्प्रेडदरः
बैंकको आधार व्याजदर केही घट्दै ९ दशमलव ९५ प्रतिशत पुगेको छ । स्प्रेडदर ३ दशमलव ९९ प्रतिशत छ । गत आर्थिक वर्ष सोही अवधिमा स्प्रेडदर ४ दशमलव १९ प्रतिशत थियो ।
ठुला शेयरधनीः

आर्थिक वर्ष २०७९/८० को वार्षिक प्रतिवेदन अनुसार कम्पनीको सबैभन्दा ठुलो शेयरधनीमा एफ एम ओ, नेदरल्याण्ड्स रहेको छ । बैंकमा एफएमओको १३ दशमलव ६९ प्रतिशत शेयर स्वामित्व रहेको छ ।
लाभांश इतिहासः
कम्पनीले आर्थिक वर्ष ०७९/८० को मुनाफाबाट कुनै पनि लाभांश वितरण गरेन । आर्थिक वर्ष २०७८/७९ मा भने ८ दशमलव २५ प्रतिशत नगद लाभांश दिएको थियो ।