संसदका नवनियुक्त महासचिव पाण्डेयले लिए शपथ

२४ माघ, काठमाडौं । संसद सचिवालयका नवनियुक्त महासचिव पदमप्रसाद पाण्डेयले बुधबार पद तथा गोपनीयताको शपथ लिएका छन् । यसअघि प्रतिनिधि सभाका सचिव रहेका उनलाई राष्ट्रपति रामचन्द्र पौडेलले मंगलबारबाटै लागु हुने गरी संसदको महासचिवमा नियुक्त गरेका थिए ।

उनलाई आज बिहान सभामुख देवराज घिमिरेले शपथ खुवाएका हुन् । शपथ समारोहमा राष्ट्रिय सभाका अध्यक्ष गणेशप्रसाद तिमिल्सिना, उपप्रधानमन्त्री एवं गृहमन्त्री नारायणकाजी श्रेष्ठ, कानुन, न्याय तथा संसदीय मामिलामन्त्री धनराज गुरुङ, प्रतिनिधिसभाका उपसभामुख इन्दिरा राना, राष्ट्रिय सभाका उपाध्यक्ष उर्मिला अर्याल पनि उपस्थित थिए ।