बुद्धभूमि हाइड्रोपावरको नाफा ६१.४१ प्रतिशत घट्यो

२५ माघ, काठमाडौं । बुद्धभूमि नेपाल हाइड्रोपावरको खुद नाफा ६१.४१५ ले घटेको छ । कम्पनीले चालु आर्थिक वर्षको दोस्रो त्रैमासमा ३२ लाख ६२ हजार रूपैयाँमा सीमित भएको जनाएको छ । 

कम्पनीले अघिल्लो वर्षको यसै अवधिमा भने ८२ लाख ५४ हजार रूपैयाँ नाफा कमाएको थियो । बुद्धभूमिको विद्युत बिक्रीबाट आम्दानी बढेपनि प्रशासनिक खर्च र वित्तीय लागतमा वृद्धि भएपछि खुद नाफामा कमी आएको हो । यसअवधिमा विद्युत बिक्रीबाट ९ करोड ५४ लाख ९२ हजार रूपैयाँ आम्दानी गरेको छ । जुन गत वर्षको ८ करोड ४८ लाख ४८ हजार रूपैयाँको तुलनामा १२.५४ प्रतिशत धेरै हो ।

प्रशासनिक खर्च ८४ लाख ५९ हजार रुपैयाँबाट बढेर १ करोड ३१ लाख रूपैयाँ पुगेको छ। वित्तीय लागत ३ करोड ५९ लाख ५६ हजार रुपैयाँबाट बढेर ५ करोड ५१ लाख ७ हजार रूपैयाँ पुगेको हो ।  खुद नाफा घटेसँगै प्रतिशेयर आम्दानी पनि प्रभावित बनेको छ ।

प्रतिशेयर आम्दानी २.६० रूपैयाँले घटेर १.६३ रूपैयाँमा सीमित भएको छ । प्रतिसेयर नेटवर्थ ९१.८३ रूपैयाँ छ । यसको शेयर पुँजी ४० करोड रूपैयाँ रहेको छ भने रिटेन्ड अर्निङ ४ करोड ५९ लाख रूपैयाँले ऋणात्मक रहेको छ ।