वैशाखमा हुन लागेको लगानी सम्मेलनमा विश्वका ९२ देशका प्रतिनिधि सहभागी हुने

२५ माघ, काठमाडौं । आगामी वैशाख १६ र १७ गते काठमाडौंमा हुने लगानी सम्मेलनमा विश्वका ९२ देशका प्रतिनिधिलाई उपस्थित गराइने भएको छ । अहिलेसम्म नेपालमा सम्पन्न सबै प्रकारका सम्मेलनभन्दा विशेष ठूलो हुने भनिएको यो सम्मेलनमा विश्वभरका ९२ भन्दा धेरै देशका प्रतिनिधि सहभागिता बन्नेछन् । विश्व बैंकका अध्यक्ष र विभिन्न देशका सरकार प्रमुख र अर्थमन्त्रीहरूको सहभागिता समेत रहनेछ ।

बिहीबार सिंहदरबारमा बसेको तेस्रो लगानी सम्मेलन २०८१ को निर्देशक समितिको तेस्रो बैठकमा अर्थमन्त्री प्रकाशशरण महतले यसबारे जानकारी दिएका हुन् । अर्थमन्त्री महतले तेस्रो लगानी सम्मेलनलाई सार्थक र उपलब्धिमूलक बनाउनु सरकारका सबै पक्षले ठूलो छाती बनाउनुपर्ने बताए । उनले विगतमा विदेशी लगानीकर्ताहरू नेपाल आफैँ सम्पर्कम जाँदा समेत उदासीन हुने गरेको भए पनि अहिले लगानी गर्न आफैँ खोज्दै आइरहेको अवसरलाई नेपालले गुमाउन नहुने बताए । 

उनले वैशाख १६ र १७ गते हुने लगानी सम्मेलनलाई ग्राण्ड सक्सेस बनाउन आग्रह गरे । अर्थमन्त्री महतले विश्व बैंकको सहुलियत दरमा ऋण दिने संस्थाको सम्मेलन नेपालमा गर्न विश्व बैंक तयार भएको र केही दिनमै औपचारिक पत्र आउने र सम्मेलन नेपालमै हालसम्मकै सबैभन्दा ठूलो अन्तर्राष्ट्रिय सम्मेलन हुने जानकारी दिए । यसका लागि सरकारका सबै निकाय गम्भीर बनेर लाग्नुपर्ने अर्थमन्त्री डा.महतले बताए । ‘कर्मकाण्डी रुपमा लागेर मात्रै हुँदैन । सबै निकाय गम्भीर बन्नुपर्छ, उनले भने । 
 
अर्थमन्त्रीका अनुसार यतिबेला अन्तर्राष्ट्रिय समुदाय समेत नेपालमा लगानी गर्नका लागि जिज्ञासु र सोधीखोजी गरिरहेका छन् । अर्थ मन्त्रालय विदेशी लगानीकर्ताको सम्पर्कमा जाँदा उदासीन देखिने गरेको सम्झिँदै उनले अहिले त्यो अवस्था फेरिएको बताए । यसबाहेक, विश्व बैंकको सहुलियत दरमा ऋण दिने सम्बन्धी सम्मेलन आगामी जुनमा हुँदैछ । यो सम्मेलन नेपालमा गर्नका लागि समेत अर्थ मन्त्रालय लागि परेको छ । अर्थ मन्त्रालयको निरन्तर पहलका बाबजुद विश्व बैंक यो सम्मेलन नेपालमा नै गर्न सहमत भएको अर्थमन्त्री महतले जानकार गिराए ।