विदेश जाने जनशक्तिलाई दक्ष बनाएर पठाउः अध्यक्ष ढकाल

२५ माघ, काठमाडौं । नेपाल उद्योग वाणिज्य महासंघका अध्यक्ष चन्द्रप्रसाद ढकालले विदेश जाने कामदारलाई पनि दक्ष बनाएर पठाउने सके अझै राम्रो रेमिट्यान्स आउने बताएका छन् । उनले अदक्ष कामदार मात्रै वैदेशिक रोजगारमा जानु पर्छ भन्ने भाष्य गलत भएको बताए । वैदेशिक रोजगारीमा पठाउनै पर्ने भएमा दक्ष जनशक्ति पठाउन सकेको खण्डमा अहिलेको तुलनामाभन्दा धेरै ठूलो मात्रामा रेमिट्यान्स भित्र्याउन सकिने उनको भनाइ छ । 

कान्तिपुर मिडियाले बिहीबार काठमाडौंमा आयोजना गरेको ’इम्प्लोयमेन्ट, माइग्रेसन एन्ड रेमिट’ सम्मेलनको पहिलो सत्र ’आन्तरिक रोजगारी दशकः सफल पार्न सकस’ मा अध्यक्ष ढकालले स्वदेशमै रोजगारी सिर्जना गर्नका लागि सरकारले औद्योगिक र व्यावसायिक गतिविधिलाई प्रवर्धन गर्नुपर्ने बताएका हुन् ।

सामाजिक सञ्जालमा व्यवसायीप्रति गरिने टिप्पणीले कहिलेकाहीँ आफूलाई नेपालमा ’व्यापार व्यवसाय बढ्नु बढाउन अभिशाप हो कि !’ जस्तो लाग्ने गरेको पनि उनले बताएका छन् । खाडी मुलुक अदक्ष मात्र नभई दक्ष कामदारको पनि गन्तव्य बन्दै गएको उनको भनाइ छ ।

‘वैदेशिक रोजगार भनेको अदक्ष कामदारको लागि मात्र रहेको भाष्य बनेको छ, त्यस्तो होइन,’ उनले भने, ‘अमेरिकाको मान्छे पनि कतारमा काम गर्छ । अमेरिकामा भन्दा राम्रो तलब कतारमा हुन्छ । अवसर लिनका लागि विकसित देशबाट विकासोन्मुख देशमा पनि गएको छ ।’ दक्ष जनशक्ति उत्पादन गर्न स्वदेशमै तालिम दिने संघसंस्था खोल्नु पर्ने उनको भनाइ छ । स्वदेशी उद्योगमा दक्ष कामदारको अभाव भइरहँदा अर्कोतिर बेरोजगारी भएकै कारण वैदेशिक रोजगारमा समेत जान बाध्य भइरहेको उनको भनाइ छ ।

‘आगामी दिनमा थप धेरै रोजगारी दिनको लागि निजी क्षेत्रका उद्योग व्यवसायलाई प्रवर्धन गर्नुपर्ने हुन्छ, तबमात्र रोजगारीको सिर्जना हुन्छ,’ उनले भने, ‘यसो भनिरहँदा निजी क्षेत्रबाट जति पनि रोजगारी सिर्जना भइरहेको छ । वास्तवमा दक्ष जनशक्ति नभएको कारण एकातिर बेरोजगारी भएका कारण विदेश जान बाध्य र अर्कोतिर दक्ष जनशक्ति छिमेकी मुलकबाट आएर काम गर्नुपर्ने अवस्था छ ।’