सानिमा जीआईसी इन्स्योरेन्सले कमायो १० करोड ५५ लाख नाफा

२६ माघ, काठमाडौं । सानिमा जीआईसी इन्स्योरेन्सले चालु आर्थिक वर्षको दोस्रो त्रैमासमा नाफा कमाएको छ। कम्पनीले १० करोड ५५ लाख रूपैयाँ खुद नाफा कमाएको हो। यो नाफा गत वर्षको यसै अवधिको तुलनामा २०.९४ प्रतिशतले बढी हो। 

अघिल्लो वर्ष यसले ८ करोड ७३ लाख रूपैयाँ नाफा आर्जन गरेको थियो। यस वर्ष कम्पनीको लगानी तथा कर्जाबाट हुने आम्दानी पनि २७.८४ प्रतिशतले बढेको बम्पनीले जनाएको हो। यसको लगानी तथा कर्जाबाट हुने आम्दानी १० करोड ३१ लाखबाट बढेर १३ करोड १८ लाख रूपैयाँ पुगेको छ। 

यता, कम्पनीको कुल दावी भुक्तानी भने ११.६३ प्रतिशतले घटेर ३१ करोड ९८ लाख रूपैयाँमा झरेको छ। गत वर्ष यो ३६ करोड १९ लाख रूपैयाँ थियो। हाल यस इन्स्योरेन्सको चुक्ता पुँजी २ अर्ब रूपैयाँ रहेको छ। यसको रिटेन्ड अर्निङमा १३ करोड ७५ लाख रूपैयाँ रहेको छ । सानिमा जीआईसीको बिमा कोषमा ४ अर्ब १५ करोड रूपैयाँ रहेको छ।

पुससम्म यसले २९ करोड ३४ लाख रूपैयाँ बराबरको खुद बिमा शुल्क आर्जन गरेको छ। यो गत वर्षको भन्दा ३२.४२ प्रतिशतले धेरै हो। यसको प्रतिशेयर आम्दानी पनि ८ रूपैयाँ ७३ पैसाबाट बढेर १० रूपैयाँ ५६ पैसा (वार्षिक) कायम भएको छ। प्रतिशेयर नेटवर्थ भने १३७ रूपैयाँ ९८ पैसा रहेको छ।