कांग्रेस नेता कोइरालाको त्याग, समर्पण र योगदान स्मरणीय

 २६ माघ, काठमाडौं । नेपाली कांग्रेसका तत्कालीन सभापति एवं प्रधानमन्त्री सुशील कोइरालाको नवौँ स्मृतिका अवसरमा सुशील कोइराला मेमोरियल फाउण्डेशनले उनीप्रति श्रद्धाञ्जलि अर्पण गरेको छ ।
 
फाउण्डेशनले आज  शालिन, सरल र सादगी राजनीतिज्ञ कोइरालाले नेपाली जनताको संविधान बनाउने सात दशक लामो अपेक्षालाई सार्थक बनाउन अग्रणी नेतृत्व प्रदान गरेको ऐतिहासिक योगदान सबैको स्मृतिमा ताजै रहेको जनाएको छ ।

दोस्रो संविधानसभाले २०७२ सालमा बनाएको नेपालको संविधानलाई मान्य बनाउन र लागू गर्न उनले अनेक व्यवधान र कठिनाइ छिचोल्दै सफल भएको तथ्य पनि जगजाहेर नै रहेको फाउण्डेशनका अध्यक्ष एवं कांग्रेसका नेता डा शशाङ्क कोइरालाद्वारा जारी सन्देशमा उल्लेख छ ।
 
आफ्नो राजनीतिक जीवन देश, जनता र लोकतन्त्रको पक्षमा समर्पित गरेको निष्ठाका प्रतीक कोइरालाले सदैव देशको सार्वभौमिकता, जनताको हित र लोकतन्त्रको स्थापना एवं सुदृढीकरण नै आफ्नो राजनीतिक उद्देश्य हो भन्ने गर्थे।
 
“देशको हित र जनताको उन्नतिभन्दा ठूलो हाम्रो अर्को कुनै लक्ष्य हुन सक्दैन । यही मान्यताको पक्षमा अनेक अभावबीच पनि कोइरालाले त्याग, समर्पण र योगदान गरेको सन्देशमा उल्लेख छ । सहमति, सहकार्य र एकताको मेलमिलाप सूत्रका प्रयोक्ता राजनीतिज्ञ कोइराला यही चिन्तन र एकबद्ध निष्ठाले नेपालको इतिहाससमेत गौरवान्वित भएको हामी ठान्दछौँ”, सन्देशमा जनाइएको छ ।
 
अध्यक्ष कोइरालाले स्मृति दिनको अवसरमा श्रद्धाञ्जलि अर्पण गर्दै संविधान कार्यान्वयनको प्रमुख दायित्वमा रहेका सरकार, राजनीतिक दल, नागरिक समाज र नेपाली जनताको सकारात्मक भूमिका रहने विश्वास फाउण्डेशनले लिएको उल्लेख गरेका छन् ।