यातायात व्यवस्था विभागका महानिर्देशक उद्धव रिजालमाथि कालोमोसो !

 २९ माघ, काठमाडौं । क्रान्तिकारी युवा संगठनले यातायात व्यवस्था विभागका महानिर्देशक उद्धव प्रसाद रिजालमाथि कालोमोसो दलेर दुर्व्यवहार गरेको छ । क्रान्तिकारी युवा संगठनले लाइसेन्स घोटालामा संलग्न भएको आरोप लगाउँदै उनलाई सोमबार कालोमोसो दलेर दुर्व्यवहार गरेको बताइएको छ । 

संगठनको एक समूहले उनलाई मीनभवनमा पुगेर कालोमोसो दलेको बताइएको छ । कार्यकक्षमै मोहन वैद्य नेतृत्वको क्रान्तिकारी कम्युनिस्ट पार्टी निकटको समूह पुगेर कालोमोसो दलेको रिपोर्टिङ आएको प्रहरीले जनाएको छ । पछिल्लो समय लाइसेन्स वितरणमा ठूलो घोटाला भएको विषय बाहिरिएको छ । यो प्रकरणमा अख्तियारले समेत छानबिन गरिरहेको छ ।