अरुण चौधरीलाई रिहा गर्न आदेश दिने न्यायाधीशको मुगुमा सरुवा

२९ माघ, काठमाडौं । प्रधानन्यायाधीश विश्वम्भरप्रसाद श्रेष्ठले चौतर्फी विरोध आएपछि बाँसबारी जग्गा प्रकरणमा नेपाल प्रहरीको केन्द्रीय अनुसन्धान ब्यूरो (सीआईबी) ले पक्राउ गरेका व्यवसायी अरुण चौधरीसहित तीन जनालाई रिहा गर्न आदेश दिने काठमाडौं जिल्ला अदालतका न्यायाधीश यज्ञप्रसाद आचार्यको काज सरुवा गरेका छन् । 

न्याय परिषद स्रोतले दिएको जानकारी अनुसार प्रधानन्यायाधीश श्रेष्ठले आइतबार आचार्यलाई काठमाडौं जिल्ला अदालतबाट मुगु जिल्ला अदालतमा काज सरुवा गरेका हुन् । बाँसबारी  छाला जुत्ता कारखानाको १० रोपनी जग्गा हडपेको आरोपमा पक्राउ परेका चौधरीसहित तीन जनालाई म्याद थप गर्न लैजाँदा दुई दिनको मात्र म्याद दिएर रिहा गर्न आचार्यले आदेश दिएका थिए । 

आचार्यको आदेशमा हजारौँलाई रोजगारी दिएको र अभिभावक रहेको भन्ने शब्दसँग गृहमन्त्री नारायणकाजी श्रेष्ठले असहमति राखेका थिए । प्रधानन्यायाधीश श्रेष्ठसँग न्यायाधीशको फैसलाबारे विभिन्न प्रश्न आएपछि आचार्यको सरुवा गरिएको हो । 
 
यसअघि नवलपुर जिल्ला अदालतमा रहँदा देशैभरबाट सबैभन्दा धेरै मुद्दा फर्छ्याेट गरेका आचार्यलाई प्रधानन्यायाधीश श्रेष्ठले नै दुई वर्ष पूरा नहुँदै काठमाडौं जिल्ला अदालतमा सरुवा गरी ल्याएका थिए । काठमाडौँको मुद्दाको चाप घटाउन सहज हुने भनी काठमाडौं ल्याइएका उनलाई आदेशका प्रयोग गरिएको भाषाका कारण विवादमा परेपछि काज सरुवा गरेर मुगु पुर्याएको हो ।