भीसी छनोट विवादबारे बुझ्न समितिले बोलायो प्रधानमन्त्री

२९ माघ, काठमाडौं । शिक्षा, विज्ञान तथा प्रविधि विकास समितिले त्रिभुवन विश्वविद्यालयको उपकुलपति (भीसी) छनोटमा आएको विवादबारे जानकारी लिन प्रधानमन्त्री पुष्पकमल दाहाल प्रचण्ड र  शिक्षामन्त्री अशोक राई लगायतलाई तीन दिनभित्र समितिमा बोलाउने निर्णय गरेको छ ।

संसदीय समितिले शिक्षा विज्ञान तथा प्रविधिमन्त्री र सिफारिस समितिका अन्य सदस्यलाई पनि समितिमा बोलाएर छलफल गर्ने निर्णय गरेको हो । समितिले त्रिभुवन विश्वविद्यालयको उपकुलपति नियुक्तिको सर्ट लिस्टमा परेका विवादित व्यक्तिहरुबारे पुनर्विचार गर्न समेत निदेृशन दिएको छ । 

सार्वजनिक भएको सर्टलिस्टमा रहेका तीर्थराज खनियाँ, केशरजंग बराल र शिवलाल भुसालमाथि प्रश्न उठेको छ । खनियाँमाथि बौद्धिक चोरीको आरोप छ भने बराललाई पोखरा विश्वविद्यालयको उपकुलपति हुँदा अनियमितता गरेको आरोप छ ।

बहालवाला कार्यवाहक उपकुलपति भुसाललाई राष्ट्रिय सूचना आयोगले जरिवाना गरेको आरोप छ । सोमबार बसेको समितिको बैठकले सिफारिस समिति र मन्त्रालयलाई विवादास्पद देखिएका व्यक्तिबारे ध्यानाकर्षण गराउने निर्णय गरेको सभापति भानुभक्त जोशीले जानकारी दिए ।