शहरमा ७ र गाउँमा ४० प्रतिशत नेपाली गरिब

२९ माघ, काठमाडौं । राष्ट्रिय तथ्यांक कार्यालयले नेपालमा २०.२७ प्रतिशत नेपाली अझै गरिब रहेको विवरण सार्वजनिक गरेको छ । शहरमा ७ प्रतिशत र गाउँमा ४० प्रतिशत नेपाली गरिबीको रेखामुनि रहेको कार्यालयको भनाइ छ । 

राष्ट्रिय तथ्यांक कार्यालयले सोमबार राजधानीमा सावजनिक गरेको नेपाल जीवनस्तर सर्बेक्षण चौथो (२०७८र८०) अनुसार सहरमा वार्षिक २ लाख ६३ हजार र गाउँमा ७१ हजार खर्च गर्न नसक्ने नेपालीलाइ गरिब भनिएको छ । तथ्यांक कार्यालयका उप प्रमुख तथ्यांक अधिकारी डा हेमराज रेग्मीका अनुसार १२ बर्ष अगाडिको तथ्यांकमा नयाँ सिमा तोकेर नया तथ्यांक सार्वजनिक गरिएको हो ।

काठमाडौमा ७ प्रतिशत र सुदुर पश्चिममा ४० प्रतिशत नेपाली गरिब रहेको देखिएको छ । उनका अनुसार गरिबीको रेखा निर्धारण गर्दा उपभोग्य वस्तुमा हुने खर्चका आधारमा गरिबीको रेखा निर्धारण गरिएको हो । एक दशकअघि नेपालमा २५.२ प्रतिशत नेपाली गरिबीको रेखा मुनि थिए । नेपालमा सबैभन्दा बढी सुदूरपश्चिममा गरिबीको दर रहेको पाइएको छ ।

चौथो जीवनस्तर सर्वेक्षणका अनुसार सातवटै प्रदेशमध्ये सुदूरपश्चिम प्रदेशमा गरिबीको दर ३४.१६ प्रतिशत रहेको पाइएको छ । यसपछि गरिबीको दर कर्णालीमा पाइएको छ ।

कर्णालीमा २६.६९ प्रतिशत गरिवीको दर पाइएको हो । सबैभन्दा कम गण्डकी प्रदेशमा ११.८८ प्रतिशत गरिबीको दर भेटिएको छ । लुम्बिनीमा २४.३५ प्रतिशत, वागमतीमा १२.५९, मधेशमा २२.५३ र कोशीमा १७.१९ प्रतिशत गरिबीको दर छ ।