नवलपरासीको पश्चिम सुस्तामा बाजे र नाती मृत फेला

१ फागुन, काठमाडौं । नवलपरासीको पश्चिमको सुस्ता गाउँपालिका–३ मर्चहवा बस्ने ६५ वर्षीय यक्षलाल चमार र उनकै ११ वर्षीय नाती गौचरण चमार मृत अवस्थामा फेला परेका छन् । आज बिहान ५ बजे दुई जनाको शव फेला परेको प्रहरी उपरीक्षक (एसपी) काजीकुमार आचार्यले बताए । 

उनीहरु घरदेखि करिब ५०० मिटर दक्षिणतर्फ मृत फेला परेका थिए ।  उनीहरुको शव १५ मिटरको दुरी फरकमा उत्तानो परेको अवस्थामा भेटिएको जिल्ला प्रहरी कार्यालय नवलपरासी पश्चिमका सूचना अधिकारी रमेश बोहराले जानकारी दिए । यक्षलाल एक छोरा, बुहारी र दुई नाती र एक नातिनीसँग बस्दै आएका थिए । उनका छोरा रोजगारीको सिलसिलामा एक–डेढ महिनाअघि भारत गएका थिए । 

श्रीमान् भारत गएपछि बुहारी पनि एक छोरा र एक छोरीलाई लिएर भारतस्थित माइत गएकी थिइन् । घरमा यक्षलाल एक नातीसँग मात्र बस्दै आएका थिए । उनीहरुको मृत्युको कारण नखुलेको र तालिमप्राप्त कुकुर झिकाइ थप अनुसन्धान भइरहेको प्रहरीले जनाएको छ ।