हाम्रो कुनै पनि शाखा बन्द गर्ने योजना छैन्ः एनआईसी बैंक

१ फागुन, काठमाडौं । एनआईसी एशिया बैंकले हाल कुनै पनि शाखा कार्यालयहरू बन्द गर्ने योजना नभएको बताएको छ । एनआईसीले शाख कार्यालयहरू बन्द गर्न लागेको भन्दै आएका समाचारहरू भ्रामक र नियोजित रहेको भन्दै यसमा कुनै सत्यता नभएको जनाएको छ ।

एक विज्ञप्ति जारी गर्दै बैंकले केही सञ्चार माध्यममा प्रकाशित तथा प्रसारित बैंकले शाखा कार्यालयहरू बन्द गर्न लागेको भन्ने कपोलकल्पित समाचारप्रति गम्भीर ध्यानाकर्षण भएको जनाएको छ । बैंकले विगत २६ वर्षदेखि देशको अर्थतन्त्रलाई चलायमान राख्नका लागि आफ्नो स्थानबाट अग्रणी योगदान दिइरहेको जनाएको छ । 

एनआईसी बैंकले हाल मुलुकभर सञ्चालन गरिरहेका ३६० शाखा कार्यालयहरू, ६७० एटिएम, ११५ वटा विस्तारित काउन्टर एवं ५१ वटा शाखा रहित बैंकिङ सञ्जालद्वारा ४१ लाखभन्दा बढी ग्राहकमा सहज एवं सरल सेवा प्रदान गरिरहेको जनाएको छ ।  

हाल विभिन्न सञ्चार माध्यमहरूमा बैंकले आफ्ना ५० शाखा कार्यालयहरू बन्द गर्न लागेको र सोको स्वीकृतिकाे लागि नेपाल राष्ट्र बैंकसमक्ष निवेदन दिएको भनी अफवाहहरू फैलाइएकोमा यस्ता समाचारमा कुनै सत्यता नरहेको जानकारी गराउँदै सो बाट भ्रमित नहुन सरोकारवाला सबैमा बैंकले अनुरोध गरेको छ ।