महासमिति बैठकः कांग्रेसले प्रतिनिधिलाई बास र साँझको खाना नदिने

१ फागुन, काठमाडौं । यही फागुन ७ देखि १० गतेसम्म ललितपुरको गोदावरीमा आयोजना हुने नेपाली कांग्रेसको महासमिति बैठकमा सहभागी हुने प्रतिनिधिबाट जनही तीन हजार दर्ता शुल्क लिइने भएको छ । प्रवेश र दर्ता शुल्कबापत उक्त रकम लिने निर्णय गरिएको हो । 

प्रचार विभाग प्रमुख मीन विश्वकर्माले दिएको जानकारी अनुसार महासमिति बैठकमा बिहानको चिया नास्ता, खाना र दिउँसो चिया बिस्कुट (हाई–टी)को व्यवस्था भने पार्टीले गर्नेछ । साँझको  खाना र बासको व्यवस्था आफैंले व्यवस्थापन गर्नुपर्नेछ । 
 
शुल्क तिरेर खान चाहनेलाई महासमिति बैठकस्थल बाहिर भोजन स्टलहरू राखिने उनले बताए । प्रचारका निम्ति तीनदेखि पाँच हजारसम्म पार्टीको झण्डा बैठक स्थल र उपत्यकाका विभिन्न ठाउँमा राखिने भएको छ । तीन हजारभन्दा बढी प्रचारात्मक स्टिकर तयार गरिने उनले जानकारी दिए । 
 
महासमिति सदस्यहरूलाई बैठक स्थलसम्म पुर्याउन साँगा, सूर्यविनायक, कोटेश्वर, कलंकी, चाबहिल, गौशालालगायत स्थानबाट गोदावरीसम्म बसको व्यवस्था गरिएको छ ।