पाल्पा जीप दुर्घटनाका मृतक १० जनाको सनाखत, घाइतेको लुम्बिनी मेडिकल कलेजमा उपचार हुँदै

२ फागुन, रामपुर (पाल्पा) ।  पाल्पामा जीप दुर्घटना हुँदा मृतकको सङ्ख्या १० पुगेको छ । आठ जनाको घटनास्थलमा र दुई जनाको उपचारका क्रममा लुम्बिनी मेडिकल कलेज प्रभासमा मृत्यु भएको हो । मृतक सबैको पहिचान खुलेको छ । मङ्गलबार राति अबेरसम्म पनि आफन्त नआएकाले मृतकको पहिचान हुनसकेको थिएन ।

तिनाउँ गाउँपालिका ६ मस्याम स्थित इको फार्म हाउस नजिकै भित्री कच्ची सडक खण्डमा डुम्रेबाट चिदीसतर्फ जाँदै गरेको लु१ज २३७१ नम्बरको जीप मङ्गलवार साँझ दुर्घटना भएको थियो । आफैँ अनियन्त्रित भएर जीप सडकबाट करिब तीन सय मिटर तल खसेको थियो ।

१० जना सनाखत भएकाहरु:-

१‌‍. तिनाउँ गाउँपालिका ६ मस्यामकी ६० वर्षीया यनकुमारी पन्त ।

२. तिनाउँ गाउँपालिका ६ का ३९ वर्षीय रामबहादुर अस्लामी ।

३. तिनाउँ गाउँपालिका ६ का ६७ वर्षीय कृष्णबहादुर अस्लामी ।

४. तिनाउँ गाउँपालिका ६ की २८ वर्षीय उर्मिला अस्लामी ।

५. रुपन्देही बुटवल उपमहानगरपालिका १४ तामनगरका ७० वर्षीय चन्द्र रणपाल ।

६. रुपन्देही बुटवल उपमहानगरपालिका १४ तामनगरकी ६० वर्षीय चुना रणपाल । 

७. तिनाउँ गाउँपालिका २ की २० वर्षीय गीता सुनार ।

८. रिब्दिकोट गाउँपालिका १ की ६६ वर्षीया विष्णुकला कामी ।

९. रिब्दीकाेट गाउँपालिका १ की ६५ वर्षीया दिलकुमारी सुनार ।

१०. रुपन्देही देवदह नगरपालिका ५ की २९ वर्षीया दिलमाया जिसी ।

मृतक १० जना सबैकाे सनाखत भएको जिल्ला प्रहरी कार्यालय पाल्पाका प्रहरी निरीक्षक तथा सूचना अधिकारी सुगन्ध श्रेष्ठले जानकारी दिए । 

उनका अनुसार दुर्घटनामा १६ जना घाइते भएका छन् । घाइतको लुम्बिनी मेडिकल कलेज प्रभासमा उपचार भइरहेको छ ।  जीप चालक तानसेन नगरपालिका १० का ४५ वर्षीय दानबहादुर चिदीलाई प्रहरीले नियन्त्रणमा लिएको छ । दुर्घटनाबारे प्रहरीले थप अनुसन्धान गरिरहेको जनाएको छ ।