रास्वपाका सभापति लामिछानेमाथि सम्पत्ति शुद्धीकरणको निगरानी, २० वटा बैंकलाई विवरण पठाउन पत्र

२ फागुन, काठमाडौं । सम्पत्ति शुद्धीकरण अनुसन्धान विभागले राष्ट्रिय स्वतन्त्र पार्टीका सभापति रवि लामिछानेमाथि छानबिन थालेको छ । विभागले लामिछाने र ग्यालेक्सी फोर के टेलिभिजनका मालिक गीतेन्द्रबाबु राईमाथि छानबिन थालेको हो ।

यस क्रममा विभागले लामिछाने र राईको बैंकिङ खाताको विवरण मागेको छ । विभागले नेपाल बैंकसहित अन्य १९ वटा बैंकलाई लामिछाने र राईको विवरण मागेको हाे । चिठीमा सम्पत्ति शुद्धीकरण सम्बन्धी कसुरको जाँचबुझको सिलसिलामा आवश्यक परेकाले बैंक खाता विवरण, खाता खोल्दाको कागजातहरू र बैंक मौज्दात पठाइदिन अनुरोध गरिएको छ ।

राई सूर्य दर्शनलगायत सहकारी ठगी प्रकरणमा फरार छन् । नेपाल प्रहरीले उनीविरूद्ध डिफ्युजन नोटिस जारी गरेको छ । लामिछाने राईका व्यापारिक साझेदार हुन् । ग्यालेक्सी फोर के टीभीमा राईसँग लामिछाने साझेदार थिए ।

विभागले राष्ट्रिय वाणिज्य बैंक, नबिल बैंक, नेपाल इन्भेष्टमेन्ट मेगा बैंक, स्ट्याण्डर्ड चार्टर्ड बैंक, हिमालयन बैंक, एसबिआई, एभरेष्ट, एनआइसी एसिया, कुमारी, कृषि विकास बैंकलगायतलाई चिठी लेखेको छ । विभागका एक कर्मचारीले दिएको जानकारी अनुसार बैंकहरुलाई माघमै पत्र पठाइएको हो ।