कांग्रेसले उपसभापति र महामन्त्रीका प्रतिवेदन पारित गर्न बोलायो बैठक

३ फागुन, काठमाडौं । नेपाली कांग्रेसले आसन्न महासमितिको बैठकमा प्रस्तुत हुने प्रतिवेदन पारित गर्न केन्द्रीय कार्यसमितिको बैठक बोलाएको छ । सभापति शेरबहादुर देउवाले आज बिहीबार दिउँसो १ बजे बस्ने गरी बैठक बोलाएका हुन् ।  

बैठक ललितपुरको सानेपास्थित पार्टी केन्द्रीय कार्यालयमा बोलाइएको छ । आजको बैठकमा महासमिति बैठक र समसामयिक राजनीतिक विषयमा छलफल हुने बताइएको छ । सोमबारदेखि सुरु हुने महासमिति बैठकमा पेश गर्न उपसभापति पूर्णबहादुर खड्का र महामन्त्रीद्वय विश्वप्रकाश शर्मा र गगन थापाले प्रतिवेदन तयार पारेका छन् ।

उपसभापति खड्काको ५६ पृष्ठ लामो नीति प्रतिवेदन, महामन्त्री गगन थापाको सांगठनिक प्रतिवेदन र अर्का महामन्त्री विश्व प्रकाश शर्माले तयार गरेको समसामयिक राजनीतिक प्रतिवेदन आजको बैठकले पारित गर्नेछ । महासमिति बैठक फागुन ७ देखि १० सम्म गोदावरीमा हुँदैछ ।