१७५ जनाविरुद्धको बालुवाटार जग्गा प्रकरण, फैसला आज

३ फागुन, काठमाडौं । चर्चित ललितानिवास जग्गा प्रकरणबारे विशेष अदालतले आज बिहीबार फैसला सुनाउने भएको छ । बुधबार फैसला सुनाउने तयारी गरे पनि नभ्याइएपछि हेर्दाहेर्दैमा राखिएको थियो । 

अख्तियार दुरुपयोग अनुसन्धान आयोगले ललितानिवासको सरकारी जग्गा व्यक्तिका नाममा दर्ता गर्न संलग्न रहेको अभियोगमा पूर्व उपप्रधानमन्त्री विजयकुमार गच्छदारसहित १ सय ७५ जनाविरुद्ध २३ माघ २०७६ सालमा भ्रष्टाचार मुद्दा दायर गरेको थियो । 

यो प्रकरणमा भ्रष्टाचारमा मुछिनेमा तत्कालीन तीन सचिवसहित विशिष्ट श्रेणीका ६ उच्च पदस्थ पदाधिकारी पनि छन् । विशेष अदालतका प्रवक्ता धनबहादुर कार्कीका अनुसार आज यसको फैसला सुनाइँदैछ । फैसला सुनाउने तयारी बुधबार नै थियो, तर, अबेर हुने देखिएपछि हेर्दाहेर्दैमा राखिएको हो, अब आज फैसला सुनाइन्छ, उनले भने । 

आयोगले सार्वजनिक जग्गा हिनामिना गरेको अभियोगसहित उच्चपदस्थ पदाधिकारीलाई बिगोको अनुपातमा जरिवाना र १० वर्षसम्म जेल सजाय माग गरेको छ । राष्ट्रसेवकका हकमा भ्रष्टाचार निवारण ऐन अनुरूप थप तीन वर्ष जेल सजाय माग गरिएको छ ।