नक्कली बैंक ग्यारेन्टीका आरोपीलाई चार वर्ष कैद, ४२ लाख जरिवाना

३ फागुन, काठमाडौं । विशेष अदालतले सर्लाहीको लालबन्दी नगरपालिकाको भवन निर्माणका क्रममा अनियमितता गरेको आरोप लागेका सन्तोष विक्रम साहलाई सजाय तोकेको छ ।  अदालतले भ्रष्टाचार निवारण ऐन, २०५९ अनुसार साहलाई बिगो बराबर ४२ लाख रुपैयाँ जरिवाना र चार वर्ष कैद हुने ठहर गरेको हो ।

माघ २५ गते विशेषका अध्यक्ष टेकनारायण कुँवर तथा सदस्यहरू तेजनारायण सिंह राई र मुरारीबाबु श्रेष्ठको इजलासले यस मुद्दामा अन्तिम निर्णय गरेको थियो भने आज सजाय तोकिएको हो । ठेकेदार शिवनन्दन पासवान र साहलाई विशेषले दोषी ठहर गरेको थियो । साह सर्लाहीको मलंगवास्थित नेपाल बैंक लिमिटेडको ऋण फाँटमा सहायक पदमा कार्यरत थिए । ठेकेदार मध्येका अनिल गुप्ताले भने यस मुद्दामा सफाइ पाएका छन् ।

ठेकेदार पासवानलाई सोही दिन दुई वर्ष कैद र बिगो बराबरको ४२ लाख जफत हुने फैसला भएकोमा साहको सजाय आज बिहीबार तोकिएको हो । भवन बनाउने ठेक्का पाएका लोकवीर बेताली–पाँचकुमारी जेभीका पार्टनरहरू अनिल गुप्ता र शिवनन्दन पासवानले ४२ लाख रुपैयाँको नक्कली एडभान्स पेमेन्ट ग्यारेन्टी (अग्रिम भुक्तानी जमानत) तयार गरेको भेटिएको थियो ।

 उनीहरूले उक्त नक्कली ग्यारेन्टीका आधारमा भुक्तानीसमेत लिइसकेका थिए । जसपछि नगरपालिका भवन निर्माण कार्य रोकिएको थियो । यसरी नक्कली बैंक ग्यारेन्टी बैंकको ऋण फाँटमा सहायक पदमा कार्यरत साहले गरेको भन्दै अख्तियारले उनलाई पनि प्रतिवादी बनाएको थियो । अख्तियारले अनुसन्धानपछि २२ भदौ ०७८ मा तीनै जनालाई प्रतिवादी बनाई मुद्दा चलाएको थियो ।