विधानलाई समयानुकूल परिमार्जन गर्न जरुरी छ : शेखर कोइराला

४ फागुन, काठमाडौं । नेपाली कांग्रेसका नेता वरिष्ठ डा. शेखर कोइरालाले महासमितिको बैठकले विधानलाई समयानुकूल परिमार्जन गर्न जरुरी रहेको बताएका छन् ।

कोइरालाले केन्द्रीय समिति बैठकमा पेश भएका प्रतिवेदनहरू पार्टीको मौलिकता अनुसारको नभएको टिप्पणी गरेका छन् । शुक्रबार प्रतिवेदन माथिको छलफलमा बोल्ने क्रममा नेता शेखरले प्रतिवेदनहरू गठबन्धनको छायाँ जस्तो देखिएको बताएका हुन् ।

बिहीबारको बैठकमा उपसभापति पूर्णबहादुर खड्काको नीति प्रस्ताव, महामन्त्री गगन थापाले सांगठनिक प्रस्ताव र अर्का महामन्त्री विश्वप्रकाश शर्माले समसामयिक प्रस्ताव पेश गरेका थिए । उक्त प्रस्तावमाथि टिप्पणी गर्दै कोइरालाले भने, ‘यहाँ प्रस्तुत प्रतिवेदन र दस्तावेजहरू हेर्दा कता—कता गठबन्धनको छायाँ परेको हो कि जस्तो देखियो । महासमिति बैठकमा प्रस्तुत हुने प्रस्तावहरू कांग्रेस पार्टीको मौलिकतामा आधारित हुनुपर्थ्यो, त्यो देखिएन।’ 

महासमिति बैठकमा २९ वटा संसदीय निर्वाचन क्षेत्र र केही भातृ तथा शुभेच्छुक संस्थाको प्रतिनिधित्व नहुने अवस्था आएको भन्दै यो विषयलाई तुरुन्त टुङ्ग्याउनुपर्ने कोइरालाको भनाइ छ । महासमितिको बैठकले ‘विधान संशोधन मस्यौदा समिति” बनाएर विधानलाई समयानुकूल परिमार्जन गर्न जरुरी रहेको उनले बताए ।