सरकारलाई दवाव दिन देशभरबाट हिडेर काठमाडौं आइपुगे मिटरब्याज पीडित [ फोटोफिचर ]

६ फागुन, काठमाडौं । काठमाडौंलाई आफ्ना मागहरु सुनाउन पूर्व र पश्चिमबाट पैदल यात्रा गर्दै मिटरब्याज पीडितहरू काठमाडौं आइपुगेका छन् । देशभरबाट करिब ३ हजार पीडितहरु काठमाडौं आइपुगेका हुन् । 

संघर्ष समितिका केन्द्रीय अध्यक्ष मनिराम ज्ञवालीका अनुसार आन्दोलनमा सहभागी हुन केही आउने क्रममा छन् । करिब छ दिन लगाएर एक हजार भन्दा बढि पीडितहरु मुग्लिङबाट काठमाडौंसम्म हिँडेर दवावपुर्ण आन्दोलन गर्दै आएका छन । सरकारले समिति बनाएर केही काम नगरेकोमा पुन सरकारलाई झकझकाउन आन्दोलन गर्न आएका बर्दियाका पीडित जीवन सुनारले बताए । 

मुग्लिङबाट हिँडेका उनीहरु छ दिनको दिन हिजो साँझ थानकोट स्थित त्रिभुवन पार्कमा आएर बसेका थिए । आज उनीहरू थानकोटबाट कलंकी हुँदै तीनकुने गएर बस्ने र भोलिदेखि शान्तिपूर्ण आन्दोलन सुरु गर्न केन्द्रीय अध्यक्ष ज्ञवालीले जानकारी दिए ।

माघ १५ गते काँकडभिट्टाबाट हिँडेका मिटरब्याज पीडितहरूको समूह मंगलबार साँझ मकवानपुरको मनहरी आइपुगेको थियो । साँझ सडक किनारमा बसेर खानाको तयारी गर्दै गरेको करिब दुई सय जनाको समूह र स्थानीयबासी बीच झडप भएको थियो ।  

झडपमा परी घाइते भएका १७ जनाको भरतपुरस्थित चितवन मेडिकल कलेजमा उपचार गराएका थिए । मिटरब्याज तथा ठगीविरूद्ध किसान मजदुर संघर्ष समितिका केन्द्रीय सदस्य विशाल क्षेत्रीका अनुसार मनहरी पुग्नै लागेको पैदलयात्रीको समूह नजिकै एक युवक सवार स्कुटी आएर ठोक्किएको थियो । त्यसपछि पीडित र ती व्यक्तिबीच केहीबेर विवाद चलेपछि आक्रमण गरेका थिए ।