कोशीका १४ जना कांग्रेस जिल्ला सभापतिको माग, ‘प्रदेशको नामबारे महासमितिमा छलफल होस’

६ फागुन, काठमाडौं । नेपाली कांग्रेसको कोशी प्रदेशका जिल्ला सभापतिहरूले प्रदेशको नामकरण विवादलाई महासमिति बैठकको मुख्य एजेण्डा बनाएर छलफल चलाउन माग गरेका छन् । उनीहरुले प्रदेश नामाकरणको विषयमा उठेको विवाद लम्बिँदै गएको भन्दै पार्टीले यसबारे ठोस धारण महासमितिको बैठकबाट दिनुपर्ने बताएका छन् । 

प्रदेशका १४ जिल्लाका सभापतिहरूले आइतबार संयुक्त विज्ञप्ति जारी गर्दै प्रदेशको नामबारे छलफल गर्न माग गरेका हुन् । फागुन ७ देखि १० गतेसम्मको महासमिति बैठकमा मुख्य एजेण्डाका रुपमा विषय प्रवेश गराउन अनुरोधसहित ध्यानाकर्षण गराएका छन् । 

उनीहरुले यसअघि १७ जेठमा पनि संयुक्त वक्तव्य निकालेर नाम पुनर्विचार गर्न आग्रह गरिएको स्मरण गराउँदै कोशी प्रदेश सरकारको वार्ता टोलीले अहिले आन्दोलनरत पक्षसँग वार्ता गरिरहेको र यसै अवसरमा पार्टीले पनि छलफल चलाउनु पर्ने बताएका छन् । 

जिल्ला सभापतिहरूले केही जिल्लाको महासमिति सदस्यको प्रतिनिधि रोकेकोमा आपत्ति जनाएका छन् । विवाद भएको भनेर सभापति र सम्बन्धित जिल्लामा खटाइएका निर्वाचन अधिकृतको राय समेत नलिई केन्द्रीय निर्वाचन समिति र केन्द्रीय कार्यसमितिले निर्णय गरेको उनीहरुको गुनासो छ ।