कांग्रेस कहिलेसम्म कम्युनिष्टको पछि लागेर हिँड्नेः वरिष्ठ नेता डा. शेखर कोइराला

६ फागुन, काठमाडौं ।  नेपाली कांग्रेसका वरिष्ठ नेता डा. शेखर कोइरालाले नेपाली कांग्रेसले भोलिबाट सुरु हुने महासमितिको बैठकमा चुनावी गठबन्धन, निर्वाचन प्रणाली र भ्रष्टाचारका विषयलाई जोडदार रुपमा उठाउनुपर्ने बताएका छन् । आइतबार महासमिति बैठकमा सहभागी हुन विभिन्न जिल्लाबाट काठमाडौं आएका महासमिति सदस्यहरूका लागि राखिएको चियापान कार्यक्रममा कोइरालाले अब कांग्रेसले एक्लै हिँड्ने आँट गर्नुपर्ने बताए ।   

उनले कांग्रेस कहिलेसम्म कम्युनिष्टको पछि लागेर हिँड्ने भन्दै अब एक्लै चुनाव लड्ने समय आएको बताए । कोइरालाले भने, ‘हामी बहुमत सरकारमा छाैं तर, हाम्रो जनमत घटिरहेको छ । यसले भोलिका दिनमा असर पार्छ । भोट प्रतिशत ३४ प्रतिशतबाट घटेर २७ मा आएको छ । सरकारको नेतृत्व नगरेपनि १० मन्त्रालय हामीसँग छन् । यो विषयमा महासमिति सदस्यले बैठकमा उठाउनु पर्छ ।’    

नेता कोइरालाले संसदीय व्यवस्था र मिश्रित निर्वाचन प्रणाली आपसमा नमिल्दो देखिएको बताए । एकातिर संसदीय प्रणाली छ, अर्कातिर बहुमतको सरकार बन्ने स्थिति नै छैन, उनले भने । कोइरालाले कतै हाम्रो निर्वाचन प्रणालीमै समस्या त होइन भन्दै कांग्रेसले अब यसलाई परिवर्तन गर्न पहल गर्नुपर्ने बताए । सबै दलसँग बसेर छलफल गरी निर्वाचन प्रणाली बदल्नुपर्ने उनको भनाइ छ । उनले संसदीय प्रणाली भनेकै बहुमतले शासन गर्ने भएको उल्लेख गरे । कुनै पनि दलको बहुमत आउने अवस्था नहुँदा कांग्रेसले आफ्नो मौलिकता नै गुमाउने अवस्था देखिएको उनको भनाइ छ ।

उनले अहिले महासमिति बैठकमा प्रस्तुत गरिने कतिपय प्रस्तावमा समेत गठबन्धनको छायाँ परेको बताए । कांग्रेसको मौलिकता फर्काउनु पर्ने उनको भनाइ छ । नेता कोइरालाले महासमिति बैठकबाट कांग्रेसको मौलिकता जोगाउन सक्नुपर्ने बताए । कांग्रेसले आफ्नो मौलिकता गुमाउँदा विगत निर्वाचनमा सात प्रतिशतभन्दा बढी मत गुमेको भन्दै उनले महासमिति बैठकमा गम्भीर समीक्षा गर्नुपर्नेमा जोड दिए ।

कांग्रेसको मौलिकतामा आँच नआउने गरी महासमितिका प्रस्तावहरू परिमार्जन गरिनुपर्छ । गत निर्वाचनमा कांग्रेसको सात प्रतिशतभन्दा बढी मत गुम्यो, कोइरालाले भने, यसको कारणबारे महासमितिमा छलफल गर्नुपर्छ ।  उनले चुनावी गठबन्धन र भ्रष्टाचारका विषयमा महासमितिले व्यापक छलफल गरेर उचित निर्णय लिनुपर्ने बताए । 

महासमिति बैठकमा प्रस्तुत गरिने प्रस्तावहरू समेत आपसमा विवादित देखिएको भन्दै उनले समन्वयमा प्रतिवेदन तयार नपारिएको सुनाए । आर्थिक सूचकांक देखाएर प्रधानमन्त्री र अर्थमन्त्रीले अर्थतन्त्र सुधार भएको दाबी गरे पनि जनताले त्यस्तो महसुस गर्न नपाएको उनको भनाइ थियो ।