कांग्रेस महासमिति बैठकमा पाँच वटा प्रतिवेदन पेश हुने, छलफल भोलि मात्र

७ फागुन, काठमाडौं । आजदेखि सुरु भएको नेपाली कांग्रेसको महासमिति बैठकमा पाँच वटा प्रतिवेदन पेश हुने भएका छन् ।  लेखा प्रतिवेदनको समय यकिन नभएपनि बाँकी चार प्रतिवेदन भने भोलि मंगलबार बिहान मात्रै पेश गरिने भएको छ ।

मंगलबार बिहान प्रतिवेदनहरू छलफलका लागि पेश हुनेछन् । बिहान ९ बजेदेखि सुरु हुने बन्द सत्रमा चारवटा प्रस्ताव पेश हुने बताइएको छ । पाँचवटा प्रस्ताव महासमिति बैठकमा पेश हुने भनिए पनि मंगलबार चारवटा पेश हुने भएको हो । 

उपसभापति पूर्णबहादुर खड्काले नीति, महामन्त्री गगन थापाले सांगठनिक, अर्का महामन्त्री विश्वप्रकाश शर्माले समसायिक र अर्थमन्त्री समेत रहेका डा. प्रकाशशरण महतले अर्थतन्त्रको वर्तमान अवस्था र चुनौती बारे प्रतिवेदन मंगलबार पेश हुनेछ ।  

लेखा संयोजक श्याम घिमिरेको लेखा प्रतिवेदन पेश गरिने समय भन ेतय भएको छैन् । महामन्त्री थापाको सांगठनिक प्रतिवेदनमा विवाद कायम रहेकाले तयार भइसकेको छैन । सभापति शेरबहादुर देउवा र महामन्त्री गगन थापाबीच सोमबार बिहान भएको छलफलले पनि सहमति पहिल्याउन सकेको छैन् । आज साँझ पुनः छलफल हुने बताइएको छ ।