अन्ततः कांग्रेसका शुभेच्छुक संस्थाको माग पुरा

९ फागुन, काठमाडौं । हिजोदेखि ललितपुरको गोदावरीमा सुरु भएको नेपाली कांग्रेसको महासमिति बैठकमा अन्ततः कांग्रेस निकटका शुभेच्छुक संस्थाहरूले विधि र पद्धति बमोजिम भाग लिन पाउने भएका छन् । पार्टीको ठाडो हस्तक्षेप विरुद्ध ६ वटा शुभेच्छुक संस्थाहरूले हिजो साँझ वक्तव्य निकालेर विरोध जनाएका थिए । उनीहरुले निर्णय नसच्चाए महासमिति बैठक नै बहिष्कार गर्ने चेतावनी दिएपछि मंगलबार बिहान पार्टी सभापति निवास बूढानीलकण्ठमा बसेको बैठकले महासमिति बैठकमा उनीहरूकाे माग बमाेजिम सहभागी हुने सदस्यहरूको टुङ्गो लगाइएको हो ।

पार्टी सभापति देउवाको ठाडो निर्देशनमा केन्द्रीय निर्वाचन समितिले अप्रासङ्गिक र अनधिकृत निर्णय गरेको भन्दै नेपाल ट्रेड युनियन कांग्रेस, नेपाल शिक्षक सङ्घ, नेपाल डेमोक्रेटिक लयर्स एसोसिएसन, सेन्टर फर डेमोक्र्याटिक इन्जिनियर्स नेपाल, प्रजातन्त्रवादी चिकित्सक संघ र नेपाल प्रेस युनियनले संयुक्त प्रेस विज्ञप्ति निकाल्दै महासमिति बैठकमा  सदस्यको रूपमा सहभागी नहुने निर्णय गरेको थियो ।

निर्वाचन समितिले पार्टी विधानको अपव्याख्या गरेको भन्दै शुभेच्छुक संस्थाहरूले चर्को विरोध गरेर पार्टीको ठाडो हस्तक्षेपकाे आलोचना गरेको थियो । निर्वाचन समितिको अक्षमता र विधानको गलत व्याख्या गरिएको प्रति खेद व्यक्त गर्दै उनीहरूले पार्टी सभापति शेरबहादुर देउवा र वरिष्ठ नेता शेखर कोइरालालाई ध्यानाकर्षण गराएका थिए । 

उनीहरुको माग बमोजिम शुभेच्छुक संस्थाहरूबाट तीन/तीन जना सहभागी गराइने निर्णय गरिएको हो । पार्टीका शुभेच्छुक संस्थाहरू नेपाल ट्रेड युनियन कांग्रेस, नेपाल शिक्षक संघ, नेपाल डेमोक्रेटिक लयर्स एशोसिएसन, सेन्टर फर डेमोक्र्याटिक इन्जिनियर्स नेपाल, प्रजातन्त्रवादी चिकित्सक संघ र नेपाल प्रेस युनियनका तीन/तीन जना महासमिति सदस्यको रूपमा सहभागी गराउने निर्णय भएको मुख्यचिव कृष्णप्रसाद पौडेलले जानकारी दिए ।