गाेदावारीमा जारी कांग्रेस महासमिति बैठकमा प्रस्तुत ५ प्रतिवेदनमाथि आजबाट छलफल हुँदै

९ फागुन, ललितपुर । नेपाली कांग्रेसको ललितपुरकाे गाेदावारीमा जारी महासमिति बैठकका क्रममा मङ्गलबार प्रस्तुत प्रतिवेदनमा आजदेखि समूहगत छलफल हुँदैछ । बैठककाे बन्द सत्रमा उपसभापति, महामन्त्रीद्वय, प्रवक्ता र लेखा समितिका संयोजकले पेस गरेको प्रतिवेदनमा छलफल गर्न चार समूह बनाइएको नेपाली कांग्रेसले जनाएकाे छ ।

बैठकमा उपसभापति पूर्णबहादुर खड्काद्वारा प्रस्तुत नीति प्रस्ताव, महामन्त्री गगनकुमार थापाद्वारा प्रस्तुत साङ्गठनिक प्रस्ताव अर्का महामन्त्री विश्वप्रकाश शर्माद्वारा प्रस्तुत समसामयिक राजनीतिक प्रस्ताव, पार्टी प्रवक्ता डा प्रकाशशरण महतले पेस गरिएका आर्थिक अवस्था, सम्भावना र भावी दिशासम्बन्धी प्रस्ताव र लेखा समितिका संयोजक श्यामकुमार घिमिरेले पेस गर्नुभएको लेखा परीक्षण प्रतिवेदन प्रस्तावमा समूहगत छलफल हुँदैछ ।

बैठककाे बन्द सत्रमा देशभरका २१ सय भन्दा बढी सदस्यहरूले भाग लिएका छन् । बैठक यही फागुन १० गते सम्म चल्नेछ ।