देउवाले गोदावरीमै बोलाए कांग्रेसको पदाधिकारी बैठक

१० फागुन, काठमाडौं । नेपाली कांग्रेसका पदाधिकारी र पूर्वपदाधिकारी बैठक बोलाइएको छ । महासमिति बैठकका विषय छलफल गर्नुपर्ने भन्दै सभापति शेरबहादुर देउवाले बैठक बोलाएका हुन् ।

सहमहामन्त्री जीवन परियारका अनुसार अहिले गोदावरीमै पदाधिकारी र पूर्व पदाधिकारीको बैठक बस्ने तयारी भइरहेको छ । महासमिति बैठकको विषय केन्द्रित छलफलका निम्ति बैठक बस्न लागेको उनले बताए । 

सोमबारदेखि सुरु कांग्रेस महासमिति बैठक आज सकाउने तयारी छ । महासमितिमा पेश भएका प्रतिवेदनमध्ये महामन्त्री गगन थापाको प्रतिवेदनका तीन विषयमा अझै सहमति नभएकाले आज यसबारे पदाधिकारी बैठकले अन्तिम निर्णय गर्ने बताइएको छ ।