महासमिति सदस्य नै नरहेका मेखलाललाई बोल्न दिएपछि बैठकमा विवाद

१० फागुन, काठमाडौं । नेपाली कांग्रेस गण्डकी प्रदेशका उपसभापति मेखलाल श्रेष्ठको विषयलाई लिएर गोदावरीमा जारी महासमितिको बैठकमा केहीबेर विवाद भएको छ । महासमिति सदस्य नभएको व्यक्तिलाई बोल्न दिएको भन्दै अन्य महासमितिका प्रतिनिधिहरूले विरोध जनाएपछि केहीबेर हल्लासमेत भएको थियो ।

बागमती र गण्डकी प्रदेश समूहमा भइरहेको छलफलमा गण्डकी प्रदेशका उपसभापति मेखलाल श्रेष्ठलाई बोल्न दिएपछि अन्य महासमिति बैठकका प्रतिनिधिहरूले आपत्ति जनाए थिए । गण्डकीका उपसभापति श्रेष्ठ प्रदेश अधिवेशन प्रतिनिधि मात्र हुन् । बिहीबार बोल्ने प्रतिनिधिमा उनलाई पनि समय दिइएको थियो । 

चार समूहमा बुधबारदेखि प्रतिवेदनमाथि प्रतिनिधिहरूले सुझाव राखिरहेका छन् । बागमती र गण्डकी समूहको लिडरमा सहमहामन्त्री महेन्द्र यादव छन् । प्रदेशको समन्वय बागमतीबाट इन्द्र बानियाँ र गण्डकीबाट प्रदेश सभापति शुक्रराज शर्माले गरेका छन् ।

श्रेष्ठलाई बानियाँले नै बोल्नका लागि बोलाएका थिए । श्रेष्ठले बोलेर सकेपछि गण्डकीकै प्रदेश उपसभापति एवं महासमिति सदस्य कल्पना तिवारी र केन्द्रीय सदस्य अजयबाबु सिवाकोटीले उठेर श्रेष्ठ महासमिति सदस्य नरहेको भन्दै विरोध गरेका थिए । महासमिति सदस्यहरूले नै बोल्न नपाएको अवस्थामा प्रदेश अधिवेशन प्रतिनिधि मात्र रहेका श्रेष्ठले कसरी मौका पाए भन्दै अरु महासमिति सदस्यहरूले पनि विरोध जनाएका थिए ।

विरोध र हो-हल्ला भएपछि बागमती प्रदेश सभापति बानियाँले श्रेष्ठको भनाई रेकर्डबाट हटाउन निर्देशन दिएका थिए । श्रेष्ठको कारण केही समय छलफल अवरुद्ध भएको थियो । विवादबारे नेपालबहससँग श्रेष्ठले भने, ‘यसअघि केन्द्रले महासमिति सदस्य नरहेका जिल्ला सभापति तथा प्रदेश सभापतिहरूलाई पनि बैठकमा सहभागिता गराउने सहमति थियो । म प्रदेश उपसभापति हो । मेरो प्रोटोकल जिल्ला सभापति भन्दा माथि हुने हुनाले म बागमती प्रदेशका सभापति बानियाँले बोलाएर म बोल्न गएको हुँ तर, साथीहरूले कुरा नबुझि विरोध गरे ।'