गणपुरण संख्या नपुगेपछि संसद बैठक स्थगित, हलमा ६५ जना मात्र भेटिए सांसद

१० फागुन, काठमाडौं । राजनीतिक दलसम्बन्धी विधेयक पारित गराउन गणपुरक संख्या नपुगेपछि प्रतिनिधि सभाको बैठक स्थगित भएको छ । आजको बैठकमा सभामुखले नेपाल मजदुर किसान पार्टीका सांसद प्रेम सुवाललाई ‘राजनीतिक दल सम्बन्धधी विधेयक’माथिको विरोधको सूचना राख्न दिएका थिए । 

विरोधको सूचना फिर्ता लिनका लागि समय दिए तर, सुवालले विरोधको सूचना फिर्ता लिएनन् । त्यसपछि सभामा उक्त सूचना स्वीकृत÷अस्वीकृतका लागि निर्णयार्थ प्रस्तुत गर्दा नेकपा एमालेका सचेतक महेश बर्ताैलाले गणपुरक संख्याको विषय उठाए ।

गणना गर्दा २७५ सदस्यीय प्रतिनिधि सभामा कुनै पनि प्रस्ताव गर्दा आवश्यक संख्या एक चौथाइ ६९ आवश्यक भएकोमा ६५ जना मात्रै उपस्थित रहेको पाइयो । त्यसपछि सभामुख घिमिरेले गणपुरक संख्या नपुगेको भन्दै बैठक स्थगित गरे । अर्को बैठक शुक्रबार बिहान ११ बजे बोलाइएको छ ।  

संसद्मा ६५ जना मात्र सांसद उपस्थित भएपछि संसद् विनाकुनै निर्णय रोकिएको हो । शून्य र विशेष समयको कार्यसूची सकिएपछि राजनीतिक दलसम्बन्धी ऐन (दोस्रो संशोधन) विधेयक पेस गर्ने कार्यसूची थियो । 

विधेयक २०८० लाई प्रस्तुत गर्न अनुमति माग्ने प्रस्तावमाथि सांसद प्रेम सुवालले राखेको विरोधको सूचनालाई निर्णयार्थ प्रस्तुत गर्नेक्रममा एमाले सचेतक महेश बर्तौलाले गणकपूरक संख्या एकिन गर्न माग गरेका थिए । 

उनले संविधानको धारा ९४ ध्यानाकर्षण गराउँदै कुनै पनि प्रस्तावमा निर्णय गर्न एक चौथाई सदस्यको उपस्थिति आवश्यक हुने ध्यानाकर्षण गराएका थिए । गणपूरक संख्या एकीन गर्न ध्यानाकर्षण गराएपछि सभामुखले तीन मिनेट घण्टी बजाएर संख्या एकीन गरेका थिए । 

एक चौथाई हुन ६९ सांसद आवश्यक हुनेमा संंख्या एकीन गर्दा ६५ जना मात्र पाइएपछि सभामुखले आजको बैठकका बाँकी सबै कार्यसूची स्थगित भएको घोषणा गरेका हुन् ।