कांग्रेस महासमिति बैठकमा गगन पक्षको नाराबाजी, मञ्चमा पठाइयो प्रहरी

१० फागुन, काठमाडौं । कांग्रेस महासमिति बैठकमा गगन थापा समर्थकले नाराबाजी गरेका छन् । महामन्त्री थापाले राखेका विषय पारित हुनुपर्ने भन्दै बैठकमा उनीहरुले नाराबाजी सुरु गरेपछि तनाव उत्पन्न भएको हो । बागमतीका सभापति इन्द्र बानियाँले संयुक्त छलफलपछि निष्कर्ष सुनाउने क्रममा गगन पक्षले नाराबाजी सुरु गरेका थिए । 

गगन थापाले प्रस्तुत गरेको प्रतिवेदनको विषयमा चुनावी गठबन्धन गर्ने या नगर्ने भन्ने विषयमा प्रतिनिधिहरूले विवाद निकालेका हुन् । बानियाँले गण्डकी र बागमती प्रदेश समूहमा भएको छलफलको निष्कर्ष पेस गर्न सुरु गरेसँगै हलमा महामन्त्री थापा समर्थकले नाराबाजी सुरु गरेका थिए । 

बानियाँले गठबन्धनको विषय रणनीतिक मात्रै हुनुपर्ने बताएका थिए । महामन्त्री विश्वप्रकाश शर्माले माहोललाई शान्त बनाउन प्रयास गरे पनि गगनको प्रस्तावअनुसार अघि बढिनुपर्ने भन्दै समर्थकहरूले नाराबाजी गरेका थिए । 

कांग्रेसको जारी महासमितिमा चौथो दिनमा आएर अवस्था तनावग्रस्त बनेको हो । समूहगत छलफलमा उठेका सुझावहरूलाई प्रदेश सभापतिहरूले प्रस्तुत गर्ने क्रममा विवाद भएको नेताहरूले बताएका छन् । सुझाव दिने क्रममा आफूहरूका कुरा नसमेटिएको भन्दै महासमिति सदस्यहरूले नेताहरू बसेको मञ्च घेरेर नाराबाजी गरेपछि सुरक्षाकर्मी बोलाएर मञ्च घेर्न लगाइएको छ ।  

नाराबाजी भएपछि बागमती प्रदेश कार्यसमिति सभापति इन्द्र बानियाँले सबै सहभागीको विचार समेटेर कुरा राख्ने भन्दै माहोल शान्त पार्ने कोसिस गरेका थिए । अहिले सुरक्षाकर्मीले स्थितिलाई नियन्त्रणमा लिने प्रयास गरिरहेको छ ।