कांग्रेस महासमितिमा ४ प्रस्ताव सर्वसम्मतिले पारित, गठबन्धन बारे केन्द्रीय समितिले आवश्यक निर्णय गर्ने

१० फागुन, ललितपुर ।  नेपाली कांग्रेसको महासमिति बैठकमा पेस भएका चार वटै प्रस्तावहरू सर्वसम्मत पारित भएका छन् । 

उपसभापति पूर्णबहादुर खड्काले पेस गरेको नीति प्रस्ताव, महामन्त्री गगन थापाले पेस गरेको सांगठनिक प्रस्ताव, महामन्त्री विश्वप्रकाश शर्माले पेस गरेको समसामयिक राजनीतिक प्रस्ताव र लेखा समिति संयोजक श्याम घिमिरेले पेस गरेको लेखा परीक्षण प्रतिवेदन महासमिति बैठकले सर्वसम्मत पारित गरेको हो । 

चार वटै प्रस्तावहरूमाथि समूहगत छलफलपछि प्रदेश सभापतिहरूले सुझावसहित धारणा राखेका थिए । त्यसपछि आवश्यक संशोधनसहित ती प्रस्तावहरू निर्णयार्थ प्रस्तुत गरिएको थियो । बैठकले चार वटै प्रस्तावहरू सर्वसम्मत रुपले पारित गरेको हो । प्रस्तावहरुमाथि आएका सुझावहरूलाई केन्द्रीय समितिले समावेश गरेर दस्तावेजहरूलाई अन्तिम रुप दिनेछ । 

बैठकमा महामन्त्री थापाले २०८४ को निर्वाचनमा गठबन्धन नगर्ने भन्ने प्रस्ताव पेस गरेका थिए । तर महासमिति बैठकले अहिले त्यसबारे कुनै निर्णय गरेन । यसलाई केन्द्रीय समितिले आवश्यकता हेरेर निर्णय गर्ने भएको छ ।