सन्दीपले तत्काल जेलबाहिरै बसेर मुद्दा लड्न पाउने

 १० फागुन, काठमाडौं । बलात्कार मुद्दामा दोषी ठहर भएका क्रिकेटर सन्दीप लामिछानेले जेल बाहिरै बसेर मुद्दा लड्न पाउने भएका छन् । सन्दीपले जिल्ला अदालत काठमाडौंको मुद्दा विरुद्ध पुनरावेदन दिएसँगै उनी तत्काल जेल जानु नपर्ने भएको हो । 

कानूनी व्यवस्था अनुसार सन्दीपले जिल्ला अदालत काठमाडौंको मुद्दा विरुद्ध पुनरावेदन दिएसँगै जेल बाहिर बस्न मुद्दा लड्न उच्च अदालत पाटनबाट  लिखित अनुमति पाएका छन् ।

उच्च अदालतमा सन्दीपको पुनरावेदन दर्ता भएको छ । मुद्दा दर्तासँगै उच्च अदालतका रजिस्ट्रारले उनलाई जेल बाहिर बसेर मुद्दा लड्न अनुमति दिएको स्रोतले बतायो । निवेदन दर्तापछि सन्दीपलाई चैत १२ गते पहिलो तारेखका लागि बोलाइएको छ ।

बलात्कार आरोपमा काठमाडौं जिल्ला अदालतले सन्दीपलाई ८ वर्ष कैद सजाय तोकेको थियो । त्यसविरुद्ध बिहीबार सन्दीपले उच्च अदालत पाटनमा पुनरावेदन निवेदन दर्ता गराएका छन् ।