कांग्रेस महासमितिबाट ११ बुँदे गोदावरी घोषणापत्र जारी

१० फागुन, काठमाडौं । नेपाली कांग्रेसको महासमिति बैठक ११ बुँदे गोदावरी घोषणापत्र जारी गर्दै सकिएको छ । फागुन ७ गतेदेखि सुरु भएर आज सम्पन्न भएको महासमिति बैठकले नेपालको संविधानको रक्षा, संघीय समावेशी लोकतान्त्रिक गणतन्त्रको सुदृढीकरण र संविधानको सार्थक कार्यान्वयन गर्ने घोषणा गरेको छ । 

कांग्रेसले मुलुकमा विद्यमान सबैखाले सामाजिक एवं जातीय क्षेत्रीय तथा लैंगिक विभेद र हिंसाविरुद्ध कार्यक्रमिक अभियान सञ्चालन गर्ने प्रतिबद्धता पनि जाहेर गरेको छ । 

गोदावरी महासमिति बैठकले पेश भएको प्रतिवेदनको अन्तिम निष्कर्ष केन्द्रीय समितिले दिने भनिएको छ । उपसभापति र महामन्त्रीहरूका ‘परस्पर बाझिएका’ प्रस्ताव सर्वसम्मतिले पारित गरेको महासमितिले निष्कर्ष निकाल्ने र कार्यान्वयन गर्ने जिम्मा केन्द्रीय समितिलाई छोडिदिएको हो । 

अब केन्द्रीय समितिमा देउवालाई बहुमतमार्फत निर्णय गर्न सहज हुने निश्चित छ । कांग्रेसको विधानअनुसार महाधिवेशनपछिको सबैभन्दा ठूलो र शक्तिशाली संस्था हो, महासमिति । महासमितिसँग नेतृत्व फेर्नेबाहेक सबै अधिकार छ । तर, चार दिन चलेको छलफलको निष्कर्ष ननिकालेरै बैठक सकिएको भन्दै केहि नेताले असहमति पनि राखेका छन् । 

कांग्रेसले महासमितिको बैठकमा नेताहरूले प्रस्तुत गरेका प्रस्तावले पार्टीको नीति, सांगठनिक कार्ययोजना र समसामयिक सन्दर्भमा स्पष्ट दृष्टिकोण निर्माण गरेको दाबी गरेको छ ।