अलपत्र पुस्तकालयको निर्माण कार्य थालियो

११ फागुन, गलकोट (बागलुङ)। विसं २०७६ मा शिलान्यास गरिएको  धवलागिरि बहुमुखी क्याम्पसको  पुस्तकालय भवन निर्माण पुनः प्रारम्भ भएको छ ।  तीन तला ढलान भएर तीन वर्षसम्म अलपत्र रहेको पुस्तकालय भवनको बाँकी काम थालिएको हो । 

तत्कालीन सांसद सूर्य पाठकको सांसद विकास कोषबाट प्राप्त ७० लाख रुपैयाँ लागतमा बनाइएको भवनको बाँकी काम यथाशीघ्र पूरा गर्ने लक्ष्यका साथ पुनः काम थालिएको क्याम्पस प्रमुख रामप्रसाद उपाध्यायले बताए । 

त्रिभुवन विश्वविद्यालयले बजेटमा उपलब्ध गराएपछि भवन निर्माणलाई अगाडि बढाइएको छ । “सांसद विकास कोषको २०७६ सालमा ४० लाख रुपैयाँ र २०७७ सालमा ३० रुपैयाँ गरी ७० लाख रुपैयाँ रकममा भवनको बाहिरी संरचनामात्रै बन्यो, तर समग्रमा भवनको ४० प्रतिशतमात्रै काम हो यो”, क्याम्पसप्रमुख उपाध्यायले भने । त्रिभुवन विश्वविद्यालयले पुस्तकालयको भवन निर्माण सम्पन्न गर्न रु एक करोड बजेट दिएकाले  निर्माणको काम पुनः सुरु भएको उनले बताए । भवन अपाङ्गमैत्री हुनेछ ।