हाजिर भएको २४ घण्टा नबित्दै ठूलो परिणाममा गाँजा बरामद गर्न सर्लाही प्रहरी सफल

११ फागुन, मलंगवा । सर्लाही प्रहरीले ठूलो मात्रामा गाँजासहित मानिस पक्राउ गरेको छ । सरुवा भएर जिल्ला प्रहरी कार्यालय सर्लाहीमा हाजिर भएको २४ घण्टा पनि नबित्दै प्रहरी प्रमुख एसपी दयानिधि ज्ञवालीको सक्रियतामा उक्त गाँजा पक्राउ परेको हो ।

समाचार अनुसार हिजो फागुन १० गते बिहान १० बजेको समयमा सर्लाहीको बागमती नपा वडा नं. ३ नयाँ बस्ती चोकस्थित नयाँरोड बरहथवा सडक खण्डमा गोप्य सूचनाको आधारमा जिप्रका सर्लाहीबाट खटिएको प्रहरीको विशेष टोलीले उक्त परिणामको लागूऔषध गाँजा पक्राउ गरेको हो ।

एसपी ज्ञवालीका अनुसार दक्षिणबाट उत्तरतर्फ आइरहेको बागमती प्रदेश ०१–०२६ च ५१५९ नं. को कारलाई सूचनाका आधारमा चेकजाँच गर्दा कार भित्र लुकाई छिपाई ल्याएको लागूऔषध गाँजा १० पोका फेला पारी कार, कार चालकलाई तत्काल नियन्त्रणमा लिएर कारबाही पक्रिया अघि बढाइएको छ ।

प्रहरीका अनुसार गाँजा तस्करमा जिल्ला पुर्वी नवलपरासी गैडाकोट नपा ११ बस्ने प्रकाश परियारको छोरा बर्ष ३० को सूर्य परियार रहेका छन् । बरामद गाँजा जप्रका सर्लाहीमा ल्याई तौल गर्दा ११६ केजी रहेको र लागूऔषध नेक्सस बारेमा थप अनुसन्धान कार्य भइरहेको प्रहरीले जनाएको छ ।