बामगतीका सभामुखले बोलाए सर्वदलीय बैठक

१३ फागुन, काठमाडौं । बागमती प्रदेशबाट प्रतिनिधित्व गर्ने राजनीतिक दलहरुको आज सर्वदलीय बैठक बस्दैछ । फागुन १५ गतेबाट सुरु हुने बागमती प्रदेशसभाको हिउँदे अधिवेशनको पूर्वसन्ध्यामा आज २ बजे प्रदेशसभामा प्रतिनिधित्व गर्ने दलहरुको सर्वदलीय बैठक बोलाइएको हो । 

बागमती प्रदेश सभाका सभामुख भुवनकुमार पाठकले आइतबार २ बजे बस्ने गरी सर्वदलीय बैठक बोलाएका हुन् । उनले सर्वदलीय बैठकमा संसदीय समितिको सभापति चयन, प्रदेश सरकार र विपक्षी दलबीच भएको सहमति र आगामी प्रदेशसभामाको कार्यसूचि तथा सदनलाई नियमित विजनेस दिने विषयमा छलफलका विषय राखेका छन् । 

सभामुख पाठकले लामो समयदेखि बागमती प्रदेशसभा अन्तर्गतका समितिको सभापति चयन, प्रदेश सरकार र विपक्षी दलबीच बजेटका सम्बन्धमा भएको सहमति कार्यान्वयन र प्रदेशसभा बैठक लगायतका विषयमा विवाद कायम रहेकै अवस्थामा सर्वदलीय बैठक ठाक्नु परेको बताएका छन् । सर्वदलीय बैठकमा दलहरुबीच सहमती हुन नसके आगामी फागुन १५ गते आह्वान भएको बैठकमा समस्या उत्पन्न हुनेछ । 

संसदमा प्रयाप्त विजनेश नरहेको र नयाँ विधेयक पनि दर्ता नभएको अवस्थामा सदनको व्यवस्थापन, कार्यसूचि र मापदण्डहरु निर्माण गरी सबै दलहरुको सहमती जुटाएर अघि बढ्ने तयारी गरेको सभामुख पाठकले बताए ।

‘संसदमा जम्मा ४ वटा विधेयक छन् । त्यसमा पनि ३ वटा संसदीय समितिमा विचाराधिन अवस्थामा छन् भने एउटा सचिवालयमा दर्ता भएको छ । सर्वदलीय बैठकमा सहमती नबनेको खण्डमा ती विधेयकहरु अघि बढ्न सक्दैनन् र नियमित बैठक बस्ने अवस्था नबन सक्छ । विगत साढे ४ महिनादेखि प्रदेशसभा बैठक बस्न सकेको छैन भने संसद नबस्दा संसदीय समितिहरुको नेतृत्व चयन, कानुन निर्माण लगायतका विषयहरु अघि बढ्न सकेको छैनन् । 

गत असोज २२ गतेदेखि प्रदेशसभा बैठक बस्न सकेको छैन । २२ माघमा संसद्को वर्षे अधिवेशन अन्त्य गरिएको ४ महिना पुरा हुँदा पनि सरकारले हिउँदे अधिवेशन आह्वान गर्न सकेको थिएन । प्रदेश प्रमुख यादव चन्द्र शर्माले फागुन १५ गते ३ बजेका लागि प्रदेशसभा बैठकको हिउँदे अधिवेशन आह्वान गरेका छन् ।