वार्ताका लागि गृह मन्त्रालयले पठाएको पत्रमा मिटरब्याज पीडितको असहमति, वार्ता नहुने संकेत

१२ फागुन, काठमाडौं । सरकारले मिटरब्याज पीडितसँग वार्ता गर्ने भन्दै पठाएको पत्रलाई लिएर मिटरब्याज पीडितहरुले असहमति जनाएका छन् । गृह मन्त्रालयले संघर्ष समितिका अध्यक्षलाई मात्र व्यक्तिगत रुपमा सम्बोधन गरी पत्र पठाएको भन्दै वार्तामा बस्ने वातावरण नबनेको उनीहरुले बताएका छन् ।  

गृह मन्त्रालयले देशका विभिन्न भागबाट पैदल हिँडेर काठमाडौं आइपुगेका मिटरब्याज पीडितलाई वार्तामा आउन आग्रह गर्दै आज आइतबार पत्र पठाएको थियो । मिटरब्याज तथा ठगीविरुद्ध किसान मजदुर संघर्ष समितिलाई आइतबार पत्र पठाएको गृह मन्त्रालयले जनाएको छ । संघर्ष समितिका अध्यक्ष अवधेश कुशवाहालाई सम्बोधन गरेर आइतबार पत्र पठाउँदै मन्त्रालयले वार्तामा आउन आग्रह गरेको छ । 

मन्त्रालयको शान्ति सुरक्षा तथा अपराध नियन्त्रण शाखाका शाखा अधिकृत चिरञ्जीवी जीएमले हस्ताक्षर गरेको पत्रमाख कुशवाहाको नेतृत्वमा मिटरब्याज समस्या समाधानका लागि पैदल यात्रा, प्रदर्शन लगायतका आन्दोलनका कार्यक्रम सञ्चालन भएकोबारे मन्त्रालयको ध्यानाकर्षण भएको भन्दै बढीमा ५ सदस्यीय वार्ता टोली गठन गरी छलफलका लागि मन्त्रालयमा उपस्थित संघर्ष समितिलाई आग्रह गरेको छ । 

यता, संघर्ष समितिले भने वार्तामा व्यक्तिगत रुपमा पत्र लेखेको भन्दै असन्तुष्टि जनाएको छ । हालै बसेको समितिको बैठकले व्यक्तिगत रुपमा पठाइएको पत्रको जवाफ व्यक्तिगत रुपमै दिने निर्णय गरेको छ ।  मिटरब्याज पीडितका लागि भन्दै पूर्वबाट कुशवाहाको नेतृत्वमा ५०० र पश्चिमबाट दीर्घ नवीनको नेतृत्वमा २०० जना पीडित पैदल मार्च गरेर काठमाडौंसम्म आएका थिए । काठमाडौं आएपछि पनि उनीहरुको विरोध प्रदर्शन जारी छ ।