अग्रिम घुस लिएको उजुरी परेपछि केयूकेएलको सीईओ नियुक्ति प्रक्रिया स्थगित, बनाइयो छानविन समिति

१३ फागुन, काठमाडौं । सञ्चालक समितिले नियुक्ति अगाडि नै घुस लिएको आरोप लागेपछि खानेपानी मन्त्रालयले काठमाडौं उपत्यका खानेपानी लिमिटेड (केयूकेएल) मा रिक्त प्रमुख कार्यकारी अधिकृत नियुक्ति प्रक्रिया स्थगित गरेको छ । केयूकेएल सञ्चालक समिति सदस्यहरूले निवेदकबाट अग्रिम घुस लिएको आरोप लागेपछि सीईओ नियुक्ति प्रक्रिया रद्द गरिएको हो ।

रिक्त सीईओ खुला प्रतिस्पर्धाबाट नियुक्त गर्न गठित सीईओ छनोट सिफारिस समितिमा बहुमत सदस्य नभई छनोट प्रक्रिया सुरु गरेर आठ जनाको संक्षिप्त सूची तयार गरिएको भन्दै अख्तियार दुरुपयोग अनुसन्धान आयोगमा उजुरी परेपछि नियुक्ति प्रक्रिया स्थगित गरिएको मन्त्रालयले जनाएको छ । सीईओ मन्त्रालयले नियुक्ति प्रक्रियाबारे छानबिन गर्न एक समिति गठन गरेको जनाएको छ । 

खानेपानी तथा ढल निकास विभागका उपमहानिर्देशक माधव तिवारीको संयोजकत्वमा तीन सदस्यीय छानबिन समिति गठन गरिएको मन्त्रालयले जनाएको छ । समितिमा मन्त्रालयका सिनियर डिभिजनल इन्जिनियर प्रभात श्रेष्ठ र मन्त्रालयका कानुन उपसचिव राजाराम दाहाल सदस्य छन् ।