संसदमा प्रमुख विपक्षी दल एमालेले देखायो पुरानै रुप

१४ फागुन, काठमाडौं । प्रमुख विपक्षी नेकपा एमालेले संसदमा नाराबाजी गरेर बैठक अवरुद्ध गरेको छ । एमालेले यसअघि सुन प्रकरणमा जस्तै निरन्तर संसद अवरोध गर्ने नीति लिएको देखिन्छ । सभामुख देवराज घिमिरे पटक पटक आग्रह गर्दै आफूले सरकारलाई जवाफ दिन रुलिङ गरेको भन्दा समेत उसले नसुनी बैठक अवरुद्ध गरेको हो । 

प्रतिनिधिसभाको सोमबार बसेको बैठकमा एमाले सांसदहरुले आ–अफ्नो स्थानमा उभिएर नाराबाजी गरे । उनीहरुले सभामुखको रुलिङ पालाना गर, दोषी मन्त्रीहरुलाई कारबाही गर जस्ता नारा लगाएका थिए । एमाले सांसदहरुको नाराबाजीपछि संसद बैठक १५ मिनेटलाई स्थगित भएको छ ।

एमालेले भौतिक पूर्वाधार तथा यातायातमन्त्री प्रकाश ज्वाला, स्वास्थ्य तथा जनसंख्यामन्त्री मोहन बस्नेत र संस्कृति, पर्यटन तथा नागरिक उड्ययनमन्त्री सुदन किरातीको राजीनामा माग गर्दै प्रतिनिधिसभाको सोमबारको बैठक अवरुद्ध गरेको हो ।

सभामुख देवराज घिमिरेले प्रतिनिधिसभाको आजको बैठकको कार्यसूची महत्त्वपूर्ण रहेको भन्दै कार्यसूची अगाडि बढाउनमा सहयोग गर्न आग्रह गरेका थिए । प्रतिनिधिसभाको सोमबारको दैनिक कार्यसूचीमा अर्थमन्त्री डा. प्रकाशशरण महतले आर्थिक वर्ष २०८०÷८१ को बजेटका सिद्धान्त र प्राथमिकता बैठकमा प्रस्तुत गर्ने रहेको छ ।

सभामुखको आग्रहपछि एमालेले सरकारले सदनमा आएर जवाफ दिनुपर्ने माग गरेको थियो । यसअघि आकस्मिक समय लिएर एमालेका सांसद गोकुल बास्कोटाले विवादित मन्त्रीहरूको राजीनामा माग गरिएको विषय, किसान, मिटरब्याजीलगायतका विषयमा संसद्मा उठेका प्रश्नको जवाफ माग गरेका थिए ।

सांसद बास्कोटाले प्रतिपक्षले बारम्बार उठाएका प्रश्नको बेवास्ता गरिएको भन्दै प्रश्न पार्टीको तर्फबाट जवाफ माग गरेका थिए । ’एउटै कुरा बारम्बार उठाइ राखिएको छ । सरकारको कानमा रुवा कसैले हालिदिएको छ ? जनप्रतिनिधिमूलक संस्थामा विपक्षी दलहरूले उठाएको कुरा नजरअन्दाज गरिरहेको छ,’ बास्कोटाले भने ।